Embætti skrifstofustjóra á skrifstofu innviða heilbrigðisþjónustu laust til umsóknar

Heilbrigðisráðuneytið auglýsir laust til umsóknar embætti skrifstofustjóra á skrifstofu innviða heilbrigðisþjónustu. Auglýsingin hefur einnig verið birt á Starfatorgi. Um er að ræða aðra af tveimur stoðskrifstofum ráðuneytisins. Helstu verkefni skrifstofunnar eru; samningar, innkaup á vöru og þjónustu í heilbrigðiskerfinu, sjúkratryggingar, lyf og lækningatæki, byggingaframkvæmdir, mönnun heilbrigðisþjónustu, úrvinnsla tölfræðiupplýsinga auk þess að framkvæma stefnu stjórnvalda og fylgja henni eftir með gerð lagafrumvarpa og reglugerða.

Heilbrigðisráðherra skipar í stöðuna til fimm ára í senn frá 1. ágúst 2021.

Helstu verkefni og ábyrgð

• Undirbyggja stefnumarkandi ákvarðanir ráðherra og móta stefnu stjórnvalda á sviði innviða heilbrigðisþjónustu.
• Stýra daglegum verkefnum og starfsfólki skrifstofunnar.
• Yfirumsjón með verkefnum er varða innviði heilbrigðisþjónustu.
• Fylgja stefnu stjórnvalda eftir gagnvart þjónustuveitendum.
• Þátttaka í nefndarstörfum og innlendu og erlendu samstarfi.
• Samstarf við stofnanir og hagsmunaaðila.

Hæfniskröfur

Skilyrði er að umsækjandi hafi;

• Háskólamenntun sem nýtist í starfi, framhaldsmenntun er áskilin.
• Þekkingu á fjármálum hins opinbera.
• Þekkingu og reynslu á sviði opinberrar stjórnsýslu.
• Hæfni og reynslu til stefnumótunar.
• Þekkingu og reynslu á sviði rekstrar og stjórnunar.
• Mjög góða hæfni í mannlegum samskiptum.
• Metnað og vilja til að ná árangri.
• Frumkvæði og sjálfstæði í vinnubrögðum ásamt hæfni í verkefnastjórnun.
• Gott vald á íslensku og færni til að tjá sig í ræðu og riti.
• Góða kunnáttu í ensku og kunnáttu í a.m.k. einu Norðurlandamáli.

Þá er æskilegt að umsækjandi hafi þekkingu og reynslu á sviði heilbrigðismála.

Frekari upplýsingar um starfið

Laun samkvæmt gildandi kjarasamningi sem fjármála- og efnahagsráðherra og Félag háskólamenntaðra starfsmanna Stjórnarráðsins hafa gert.

Sérstök hæfnisnefnd, skipuð þremur einstaklingum, mun meta hæfni umsækjenda og skila greinargerð til heilbrigðisráðherra, sem skipar í embættið. Nefndin starfar skv. reglum nr. 393/2012 um ráðgefandi nefndir er meta hæfni umsækjenda um embætti við Stjórnarráð Íslands og lög nr. 70/1996 um réttindi og skyldur starfsmanna ríkisins.

Áhugasamir einstaklingar, eru hvattir til að sækja um starfið óháð kyni. Með umsókn skal fylgja ítarleg starfsferilsskrá ásamt kynningarbréfi þar sem gerð er grein fyrir ástæðum umsóknar og hvernig viðkomandi uppfyllir hæfniskröfur. Umsókn skal skila rafrænt á netfangið [email protected]

Öllum umsóknum verður svarað þegar ákvörðun um skipun í embættið liggur fyrir. Tekið skal fram að umsóknir geta gilt í sex mánuði frá því að umsóknarfrestur rennur út, sbr. reglur nr. 464/1996, um auglýsingar á lausum störfum, með síðari breytingum.

Upplýsingar um embættið veitir Ásta Valdimarsdóttir ráðuneytisstjóri ([email protected]) sími 545 8700.

Starfshlutfall er 100%

Umsóknarfrestur er til og með 21.06.2021

Nánari upplýsingar veitir

Brynhildur Magnúsdóttir - [email protected]

• Smelltu hér til að sækja um starfið