Viljayfirlýsing um undirbúning viðburða í tilefni 50 ára afmælis gosloka

Í dag undirrituðu þær Katrín Jakobsdóttir, forsætisráðherra, og Íris Róbertsdóttir, bæjarstjóri Vestmannaeyja, viljayfirlýsingu um samvinnu og undirbúning viðburða í tilefni þess að árið 2023 verða 50 ár liðin frá eldgosinu á Heimaey og 60 ár liðin frá eldgosinu í Surtsey.

Til stendur að skipuleggja samnorrænan ráðherrafund forsætisráðherra í Vestmannaeyjum sumarið 2023 í kringum Goslokahátíð Vestmannaeyja.  Jafnframt stendur til að reisa minnisvarða á Heimaey með skírskotun til eldgosanna. Þá stendur til að skipuleggja málstofu um eldgosin í samvinnu við Jarðfræðafélag Íslands, fræðasamfélagið, HÍ, Veðurstofu, almannavarnir, embætti ríkislögreglustjóra, áhugafólk og fræðimenn.

Meginmarkmiðið með þessu er að vekja athygli Íslendinga á eldgosunum og þýðingu þeirra fyrir náttúruna og samfélagið. Jafnframt er það markmið að kynna eldgosin fyrir ráðamönnum Norðurlandanna og færa þeim þakkir fyrir veitta  aðstoð í kjölfar eldgossins á Heimaey.

Ómetanleg aðstoð barst frá Norðurlöndunum við endurreisn samfélagsins að loknu eldgosinu á Heimaey. Myndarlegum fjárveitingum úr ríkissjóðum Norðurlandanna var varið til uppbyggingar í Vestmannaeyjum sem og á meginlandinu til þess að tryggja flóttafólki heimili og þjónustu. Jafnframt stóðu Norðurlöndin fyrir almennum söfnunum og fyrir það fé var m.a. hægt að byggja hjúkrunarheimilið Hraunbúðir og leikskólann Kirkjugerði í Vestmannaeyjum. Jafnframt færðu Norðurlöndin Íslendingum fjölmörg hús fyrir flóttafólkið úr Vestmannaeyjum.

Gert er ráð fyrir að skipuð verði verkefnisstjórn með fulltrúum stjórnvalda og Vestmannaeyjabæjar, sem mun annast undirbúning og skipulagningu viðburðanna.