Verðlagsnefnd búvara: Ákvörðun um verð á mjólk og mjólkurvörum

Verðlagsnefnd búvara hefur tekið ákvörðun um hækkun lágmarksverðs mjólkur til bænda og heildsöluverðs mjólkur og mjólkurafurða sem nefndin verðleggur. Eftirfarandi verðbreytingar munu taka gildi þann 1. desember 2021:

• Lágmarksverð 1.fl. mjólkur til bænda hækkar um 3,38%, úr 101,53 kr./ltr í 104,96 kr./ltr.
• Heildsöluverð mjólkur og mjólkurvara sem nefndin verðleggur hækkar almennt um 3,81%, nema verð á undanrennu- og nýmjólkurdufti verður óbreytt.

Verðhækkunin er til komin vegna kostnaðarhækkana við framleiðslu og vinnslu mjólkur frá síðustu verðákvörðun 1. apríl 2021. Frá síðustu verðákvörðun til desembermánaðar 2021 hafa gjaldaliðir í verðlagsgrundvelli kúabús hækkað um 3,38%. Á sama tímabili hefur vinnslu- og dreifingarkostnaður afurðastöðva hækkað um 2,34%. Auk kostnaðarhækkana sem þegar hafa orðið byggir verðhækkun nú á umsaminni hækkun launa þann 1. janúar nk. og er þá hækkun vinnslu- og dreifingarkostnaðar 4,32%. Með því að taka tillit til þessarar launahækkunar nú er talið að ekki verði þörf á nýrri verðlagningu í janúar 2022.