Ísland og Suður-Kórea fagna sextíu ára stjórnmálasambandi
Ísland og Suður-Kórea halda þessa dagana upp á sextíu ára stjórnmálasambandsafmæli. Löndin tóku upp formlegt stjórnmálasamband þann 10. október 1962. Af því tilefni sækir Þórdís Kolbrún Reykfjörð Gylfadóttir utanríkisráðherra menningardagskrá í Hörpu í dag sem sendiráð Suður-Kóreu í Osló stendur fyrir ásamt samstarfsaðilum á Íslandi. Forseti Íslands, Guðni Th. Jóhannesson, og Yun Seok-yeol, forseti Suður-Kóreu, skiptust á árnaðaróskum í tilefni afmælisins í gær. Gott samstarf og vinátta þjóðanna var forsetunum ofarlega í huga í bréfum sínum.
Á þeim sextíu árum sem liðin eru síðan formlegt stjórnmálasamband var tekið upp hafa löndin þróað náið samstarf á hinum ýmsu sviðum, svo sem í mennta- og menningarmálum, vísindum og ekki síst málefnum norðurslóða. Suður-Kórea hefur verið áheyrnaraðili að Norðurskautsráðinu síðan árið 2013 og verið virkur þátttakandi á þeim vettvangi. Þá sækir suður-kóresk sendinefnd Hringborð norðurslóða sem fer fram í Reykjavík dagana 13.-16. október.
Íslensk viðskiptasendinefnd undir forystu Lilju Alfreðsdóttur, menningar- og viðskiptaráðherra mun halda til Seúl í nóvember. Það eru Íslandsstofa og sendiráð Íslands í Tókýó, sem jafnframt er sendiráð Íslands gagnvart Suður-Kóreu, sem standa að skipulagningu ferðarinnar með góðri þátttöku íslenskra fyrirtækja í hinum ýmsu geirum auk þess að staðið verður að viðburðum og kynningum á sviði kvikmynda og tónlistar, sjávarútvegs og sjávarútvegstækni, orkulausnum og ferðaþjónustu.
It's a great pleasure to celebrate 60 years of diplomatic relations between Iceland and the Republic of Korea today. 🇮🇸 & 🇰🇷 have developed close cooperation in various fields since 1962 & I look forward to continue growing our bilateral relations & the friendship of our peoples.
— Þórdís Kolbrún Reykfjörð Gylfadóttir🇮🇸 (@thordiskolbrun) October 10, 2022
Today we celebrate the 60th anniversary of the establishment of diplomatic relations between the Republic of Korea and the Republic of Iceland.
— 박진 외교부 장관 FM Park Jin (@FMParkJin) October 9, 2022