Stýrihópur um stafrænar lausnir í heilbrigðisþjónustu

Willum Þór Þórsson heilbrigðisráðherra hefur skipað stýrihóp um þróun og stefnumótun varðandi stafrænar lausnir og heilbrigðistækni í heilbrigðisþjónustu. Hópurinn verður samráðsvettvangur og ráðuneytinu til ráðgjafar við að móta stefnu og framtíðarsýn á þessu sviði.

Hópnum er meðal annars ætlað að fjalla um framtíð vefgáttarinnar heilsuveru og byggja grunn að miðlægu gagnasafni ópersónulegra upplýsinga til að styðja við ákvarðanatöku og stefnumótun í málaflokknum. Ennfremur mun hann fjalla um fjárfestingar í tækni- og hugbúnaði og samþættingu gagnagrunna og notendaviðmóts hjá stofnunum heilbrigðiskerfisins.

Hópnum er ætlað að vinna tillögu að stefnu um stafrænar lausnir í heilbrigðisþjónustu til ársins 2030. Við stefnumótunarstarfið skal byggt á heilbrigðisstefnu til ársins 2030, stafrænni stefnu heilbrigðisráðuneytisins og tekið mið af markmiðum ríkisstjórnarinnar um stafrænt Ísland.

Gert er ráð fyrir að stýrihópurinn muni kalla til sín aðra hag- og samstarfsaðila eftir þörfum, svo sem frá Sjúkratryggingum Íslands, Lyfjastofnun, Samtökum iðnaðarins, Sambandi íslenskra sveitarfélaga, Nýjum Landspítala og notendaráði heilbrigðisþjónustunnar.

Ásta Valdimarsdóttir, ráðuneytisstjóri í heilbrigðisráðuneytinu er formaður stýrihópsins. Aðrir fulltrúar í hópnum eru:

• Arnar Bergþórsson, sérfræðingur í heilbrigðisráðuneytinu, án tilnefningar
• Ingi Steinar Ingason, tilnefndur af embætti landlæknis
• Alma D. Möller, tilnefnd af embætti landlæknis
• Dagný Jónsdóttir, tilnefnd af Samtökum heilbrigðisfyrirtækja
• Sigurður E. Sigurðsson, tilnefndur af Sjúkrahúsinu á Akureyri
• Sigríður Dóra Magnúsdóttir, tilnefnd af Heilsugæslu höfuðborgarsvæðisins
• Björn Jónsson, tilnefndur af Landspítala
• Hanna Kristín Guðjónsdóttir, tilnefnd af Landspítala
• Agnar Guðmundsson, tilnefndur af Landssambandi heilbrigðisstofnana
• Ingibjörg Eyþórsdóttir, tilnefnd af Samtökum fyrirtækja í velferðarþjónustu

Stýrihópurinn er skipaður af heilbrigðisráðherra til næstu fjögurra ára.