Mælti fyrir þingsályktunartillögu um aðgerðaáætlun í geðheilbrigðismálum
HeilbrigðisráðuneytiðAðgerðaáætlunin byggist á stefnu Alþingis í geðheilbrigðismálum til ársins 2030. Líkt og þar kemur fram skal heilbrigðisráðherra leggja fram aðgerðaáætlun til fimm ára í senn sem skal endurskoða árlega. Stefnan sjálf vísar veginn til umbóta, breytinga, þróunar og nýsköpunar á sviði geðheilbrigðismála en með áætlun um aðgerðir er útfært ýtarlega hvernig stefnunni verður hrint í framkvæmd.
Víðtækt samráð
Aðgerðaáætlun í geðheilbrigðismálum byggist á yfirgripsmikilli undirbúningsvinnu og gagnagreiningu. Víðtækt samráð hefur átt sér stað við gerð hennar og drög að aðgerðaáætluninni voru unnin í samvinnu heilbrigðisráðuneytis og samráðshóps helstu haghafa í geðheilbrigðismálum á Íslandi. Drögin voru birt í samráðsgátt stjórnvalda í lok síðasta árs. Alls bárust 27 umsagnir og voru umsagnaraðilar jákvæðir og fögnuðu þeim megináherslum sem fram koma í áætluninni.
Til að aðgerðaáætlunin nái fram að ganga er nauðsynlegt að farsælt samráð og samstarf verði á milli heilbrigðisráðuneytis, annarra ráðuneyta, heilbrigðisstofnana og annarrar heilbrigðisþjónustu, jafnt opinberrar sem einkarekinnar og við góðgerðarstofnanir, félagasamtök, sveitarfélög og aðra velferðarþjónustu við framkvæmd geðheilbrigðisstefnu. Þá skal lögð áhersla á samþættingu áætlunarinnar við aðgerðir í öðrum opinberum áætlunum þar sem það á við til að ná fram markmiðum stefnu í geðheilbrigðismálum.