Vegna áskorunar stjórnar Íslensku óperunnar til ríkisstjórnarinnar​

Vegna nýbirtrar áskorunar stjórnar Íslensku óperunnar til ríkisstjórnarinnar þar sem fram kemur að Íslensku óperunni hafi verið tilkynnt að rekstrarframlögum til hennar verði hætt, áður en búið er að móta framtíð óperustarfsemi á landinu sem skapar óhjákvæmilega mikla óvissu, vill menningar- og viðskiptaráðuneytið árétta eftirfarandi:

Eins og stjórn Íslensku óperunnar er kunnugt um hefur á undanförnum misserum verið unnið að framtíðarfyrirkomulagi óperustarfsemi í landinu í samræmi við stjórnarsáttmála ríkisstjórnarinnar.

Til þess að stuðla að samfellu og fyrirsjáanleika í óperustarfsemi í landinu á meðan ofangreindri vinnu stendur, hefur ráðuneytið undanfarin misseri átt í nánu samtali við forsvarsmenn Íslensku óperunnar um fjármögnun hennar í ár og á næsta ári. Ráðuneytið hefur tryggt fjárframlög til Íslensku óperunnar á árinu 2023 og 2024 til þess að koma til móts við skuldbindingar hennar og standa straum af kostnaði við uppsetningu verksins Agnesar haustið 2024. Áætlað er að fjárframlög til Íslensku óperunnar nemi samtals 334 m.kr á tímabilinu.

Þannig hefur Íslensku óperunni ekki verið tilkynnt að fjárframlögum til hennar verði hætt áður en búið er að móta framtíð óperustarfsemi á landinu líkt og fram kemur í áskorun stjórnar hennar til ríkisstjórnarinnar.

Sérstakt ráðgjafaráð hefur verið sett á laggirnar vegna vinnunnar þar sem Þórunn Sigurðardóttir, listrænn stjórnandi, gegnir formennsku fyrir hönd ráðherra. Ásamt henni eiga Þóra Einarsdóttir, óperusöngvari, og Þórunn Gréta Sigurðardóttir, tónskáld, sæti í ráðinu fyrir hönd Bandalags íslenskra listamanna og varamenn þeirra eru Erling Jóhannesson og Páll Ragnar Pálsson.

Eins og áður hefur komið fram verður á næstunni auglýst eftir verkefnisstjóra til að sjá um undirbúning að stofnun þjóðaróperu. Áfram verður unnið að því hvaða sviðsmynd að þjóðaróperu yrði líklegust til árangurs í íslenskum aðstæðum.Á sama tíma er til skoðunar í menningar- og viðskiptaráðuneyti hvernig hægt er að auka stuðning við grasrótarstarfsemi tengdri óperu.