Norrænir dómsmálaráðherrar funduðu í Reykjavík

Norðurlönd hafa löngum verið í fararbroddi þegar kemur að jafnréttismálum. Engu að síður er ofbeldi í nánum samböndum vandamál í öllum norrænu löndunum. Með því að geta betur komið í veg fyrir ofbeldi í nánum samböndum mætti bjarga fleiri mannslífum og vernda fleiri einstaklinga fyrir hörmulegum afleiðingum ofbeldis. Á fundinum var fjallað um reynslu norrænu landanna af aðferðum til að stöðva heimilisofbeldi snemma.

Einnig var það rætt á fundinum hvað hægt sé að gera á Norðurlöndum til þess að tryggja að ofbeldismál njóti þess forgangs sem nauðsynlegur er allan feril málsins í réttarkerfinu og einnig hvernig Norðurlönd geti uppfyllt tilmæli Istnabúl-samningsins. Istanbúl-samningurinn er alþjóðlegur samningur um vernd barna og kvenna gegn ofbeldi sem öll norrænu löndin hafa skrifað undir.

Mikilvægt er að Norðurlönd skiptist á upplýsingum og reynslu af réttarfarslegum aðgerðum og aðferðum til þess að byggja upp þekkingu. Norrænu dómsmálaráðherrarnir skiptust á reynslu og ræddu fleiri málefni á fundinum, svo sem aðgerðir gegn glæpastarfsemi ungmenna og möguleikann á að nota erfðafræðirannsóknir við rannsókn grófra brota og ofbeldis.

„Við þurfum að geta gripið fyrr og betur inn þegar kemur að því að skapa öryggi innan veggja heimilisins eða koma í veg fyrir glæpi ungs fólks. Það felst mikið norrænt gildi í því að löndin miðli af reynslu sinni hvert til annars. Saman erum við fljótari skapa þekkingargrunn sem byggja má aðgerðir á,“ segir Karen Ellemann, framkvæmdastjóri Norrænu ráðherranefndarinnar.