Jafnlaunavottun 2023 – hverfandi launamunur í utanríkisráðuneytinu mælist nú konum í vil
Leiðréttur launamunur kynjanna í utanríkisráðuneytinu nemur nú 0,3 prósentum og mælist konum í vil í fyrsta skipti. Ráðuneytið hlaut í gær vottun frá Vottun hf., sem er staðfesting þess að jafnlaunakerfi ráðuneytisins samræmist kröfum jafnlaunastaðalsins. Utanríkisráðuneytið hlaut fyrst jafnlaunavottun árið 2019 og hefur ráðuneytið náð mjög góðum árangri í að eyða kynbundnum launamun.
„Kynbundinn launamunur á ekki heima í íslensku samfélagi og þess vegna er þessi niðurstaða afar kærkomin. Mikil vinna liggur að baki þessa góða árangurs og því er gleðilegt að sjá að launamunur kynjanna í utanríkisráðneytinu er nær hverfandi og eilítið konum í vil í fyrsta skipti,“ segir Þórdís Kolbrún Reykfjörð Gylfadóttir utanríkisráðherra.
Meginmarkmið jafnlaunavottunar er að vinna gegn kynbundnum launamun og stuðla að jafnrétti kynjanna á vinnumarkaði. Vottunin var lögfest í júní 2017 með breytingum á lögum nr. 10/2008 um jafna stöðu og jafnan rétt kvenna og karla.
Með innleiðingu jafnlaunastaðalsins gafst fyrirtækjum og stofnunum tækifæri til að koma á fót stjórnunarkerfi til að tryggja að málsmeðferð og ákvarðanir í launamálum byggist á málefnalegum sjónarmiðum og feli ekki í sér kynbundna mismunun.
Efnisorð
Heimsmarkmiðin
