Óskað eftir umsóknum um styrki í nýjan vinnuverndarsjóð

Vinnuverndarsjóður er nýtt samstarfsverkefni félags- og vinnumarkaðsráðuneytisins og Vinnueftirlitsins. Markmið hans er að efla rannsóknir á sviði vinnuverndar og stuðla að bættri vinnuvernd á íslenskum vinnumarkaði. Sjóðnum er ætlað að styrkja verkefni og rannsóknir sem miða að þessu.

Frestur til að skila inn umsóknum í sjóðinn er til 28. nóvember. Stefnt er að úthlutun styrkja í desember 2023.

Áhugasöm eru hvött til að kynna sér nánar reglur um úthlutun styrkja úr Vinnuverndarsjóði en við mat á umsóknum verður einkum litið til verkefna og rannsókna er varða:

• tengsl einstakra sjúkdóma og vinnutengdra einkenna við vinnuumhverfi
• samfélagslegan og efnahagslegan ávinning af vinnuvernd
• orsakir, tíðni og þróun vinnuslysa í ákveðnum starfsgreinum
• jákvæða ímynd og viðhorf almennings til vinnuverndar
• vitundarvakningu einstakra hópa á vinnumarkaði um vinnuvernd, svo sem starfsfólks sem skilur ekki íslensku, ungs fólks og starfsfólks er sinnir áhættusömum störfum
• þekkingu á mikilvægi góðrar vinnustaðamenningar
• tengsl slæmra vinnuskilyrða og fjarveru starfsfólks
• aukna vitund almennings um vinnutengda kulnun og hvernig megi fyrirbyggja hana
• nýsköpun á sviði vinnuverndar
• viðbrögð við áhrifum aukinnar sjálfvirkni og tæknivæðingar á vinnuumhverfið
• áhrif samþættingar fjarvinnu og vinnu á vinnustað á vinnuvernd

Tengsl einstakra sjúkdóma og vinnutengdra einkenna við vinnuumhverfi

Við fyrstu úthlutun sjóðsins verður lögð sérstök áhersla á verkefni og rannsóknir er varða tengsl einstakra sjúkdóma og vinnutengdra einkenna við vinnuumhverfi.

Gæði rannsóknar- eða verkefnaáætlunar ásamt vísindalegu gildi, nýmæli og mikilvægi er lagt til grundvallar við mat á styrkhæfi umsókna auk menntunar og hæfis umsækjenda.

Stjórn sjóðsins annast mat á umsóknum um styrki en hana skipa fulltrúar frá Alþýðusambandi Íslands, Samtökum atvinnulífsins og Vinnueftirlitinu.

Vinnuverndarsjóður hefur 10 milljónir króna til úthlutunar á árinu 2023.

Hámarksstyrkur til einstaks verkefnis er 4 milljónir króna.

Umsóknir sendist á [email protected]. Óska má eftir nánari upplýsingum í gegnum sama netfang.

• Sjá einnig: Rannsóknasjóði verður komið á fót til að styrkja rannsóknir á sviði vinnuverndar