Góð skemmtun er örugg og ofbeldislaus

Dómsmálaráðuneytið, lögreglan og Neyðarlínan hrinda af stað vitundarvakningunni Góða skemmtun fyrir sumarið 2024. Vitundarvakningin hvetur til þess að fólk skemmti sér vel á hátíðum sumarsins – og að þau sem standa að viðburðum tryggi með góðum undirbúningi og skipulagi að samkoman verði góð skemmtun þar sem öryggi gesta er í forgangi.
Fyrstu stóru sumarskemmtanir landsmanna verða nú um helgina; Bíladagar á Akureyri og 17. júní á landsvísu.

Heimsfaraldur Covid-19 dró betur fram samspil afbrota við næturlíf og skemmtanir landsmanna. Þannig fækkaði tilkynningum til lögreglu um líkamsárásir, fíknefnabrot, ölvunarakstur og nauðganir tengdar skemmtanalífinu um helgar á meðan samkomutakmarkanir voru í gildi en fjölgaði aftur þegar þeim var aflétt.
Meginskilaboðin í vitundarvakningunni eru að góð skemmtun er örugg og ofbeldislaus. Slagsmál, ógnun, kynferðislegt ofbeldi og áreitni eiga aldrei að líðast. Skemmtanir sumarsins eru margar og fjölbreyttar. Líkurnar á afbrotum eru meiri á stærri viðburðum sem telja þúsundir manna og næturskemmtunum heldur en t.d. á litlum bæjarhátíðum að degi til með áherslu á menningu, matvæli, listmuni og vöfflukaffi. Ekki er þar með sagt að alvarleg atvik geti ekki allt eins komið upp á umfangsminni viðburðum, en líkur á afbrotum aukast eðli máls samkvæmt eftir því sem samkoman er fjölmennari.

Á vef Neyðarlínunnar og lögreglunnar er hægt að nálgast góð ráð fyrir viðburðahaldara, sveitarfélög, foreldra og forsjáraðila og ungmenni, sem og markaðsefni til að deila áfram til að auka líkur á öruggri og ofbeldislausri skemmtun.

Góð ráð til viðburðahaldara

Góð ráð til foreldra og forsjáraðila

Nánari upplýsingar um vitundarvakninguna eru á vef lögreglunnar