Heill heimur af börnum – Börn setja mark sitt á Íslandskortið
.jpg)
Í tilefni þess að 80 ár eru liðin frá stofnun lýðveldis á Íslandi efna Safn Jóns Sigurðssonar á Hrafnseyri og Þjóðgarðurinn á Þingvöllum til verkefnisins „Heill heimur af börnum – Börn setja mark sitt á Íslandskortið“. Verkefnið er leitt af Kristínu R. Vilhjálmsdóttur og byggir á aðferðum Menningarmóts sem Kristín hefur þróað og unnið í grunnskólum á Íslandi og í Danmörku.
Efnt verður til samstarfs við grunnskóla á Vestfjörðum í tengslum við Púkann, barnamenningarhátíð Vestfjarða og skóla í nærumhverfi Þingvalla. Einnig verður kallað eftir innleggi í verkefnið frá grunnskólum hringinn í kring um landið.
Markmið verkefnisins eru:
- Að skapa meðvitund um mikilvægi þess að kynnast sögu, styrkleikum og hugmyndaauðgi annarra.
- Að efna til samræðu um hvernig hver og einn, og rödd hvers og eins, skiptir máli í lýðræðislegu samfélagi.
- Að hlúa að virðingu hvert fyrir öðru þvert á fjölbreyttan tungumála- og menningarbakgrunn.
Við lítum til fortíðar og framtíðar og stöldrum við í nútímanum. Til að opna á gagnvirka forvitni og áhuga – opna augu barna á Íslandi fyrir því ríkidæmi sem er að finna á hverjum og einum stað – munu þau sjálf taka þátt í að skilgreina „ríkidæmið“ í nærumhverfi sínu (fólkið, landslag, náttúru, menningarlíf, menningararf o.s.frv.).
- Þjóðgarðurinn á Þingvöllum
- Safn Jóns Sigurðssonar, Hrafnseyri
- Um Púkann - Barnamenningarhátíð Vestfjarða