Drög að stefnu og framkvæmdaáætlun í málefnum innflytjenda
Í stefnunni kemur í fyrsta sinn fram framtíðarsýn íslenskra stjórnvalda og meginmarkmið til ársins 2038 í málefnum innflytjenda. Stefnan er unnin í breiðu samráði við haghafa og almenning með sérstakri áherslu á aðkomu innflytjenda sjálfra. Alls hafa um 550 einstaklingar komið að vinnunni og er stefnan niðurstaða þessa breiða samráðs. Stefnunni er ætlað að vera leiðarljós til framtíðar og styrkja grundvöll ákvarðana um þau málefni sem snerta líf og velferð innflytjenda hér á landi. Hún leggur grunn að samábyrgð samfélagsins, jafnt innlendra sem innflytjenda, við mótun inngildandi samfélags.
Framkvæmdaáætlunin er unnin að tillögum innflytjendaráðs í samráði við ráðuneyti og stofnanir sem bera ábyrgð á aðgerðum áætlunarinnar. Hún er sett fram til að fylgja eftir markmiðum stefnunnar og er fyrsta skref af mörgum til að ná fram langtímaáhrifum og því framtíðarsamfélagi sem birtist í stefnunni. Í áætluninni eru 26 aðgerðir sem skiptast í 70 verkefni.
Úttekt OECD um innflytjendur á Íslandi sem birt var fyrr í mánuðinum var hluti af ofangreindri vinnu við gerð stefnunnar og framkvæmdaáætlunarinnar.
Þrjú tungumál og auðlesið efni
Stefnan og framkvæmdaáætlunin eru birt á þremur tungumálum: Íslensku, ensku og pólsku. Auk þess má í samráðsgáttinni finna auðlesna útgáfu af framkvæmdaáætluninni með hlekkjum á auðlesna útgáfu stefnunnar sem birtist í vor.
- Íslenska: Samráð um drög að tillögu til þingsályktunar í málefnum innflytjenda
- Enska: Consultation on a draft proposal for a Parliamentary Resolution on Matters of Immigrants
- Pólska: Konsultacje w sprawie projektu uchwały w zakresie spraw dotyczących imigrantów
- Auðlesið efni: Drög að framkvæmdaáætlun í málefnum innflytjenda 2025-2028
„Ég hef lagt ríka áherslu á málefni innflytjenda frá því að ég tók við embætti félags- og vinnumarkaðsráðherra. Nú hillir undir fyrstu heildstæðu stefnu Íslands í málefnum innflytjenda. Það skiptir miklu máli og er löngu tímabært,“ segir Guðmundur Ingi Guðbrandsson, félags- og vinnumarkaðsráðherra.
.jpg?proc=MediumImage)
Sjá einnig: