Hoppa yfir valmynd

Haus fyrir smærri skjái

Merki Stjórnarráðs Íslands Stjórnarráð Íslands
4. október 2024 Utanríkisráðuneytið

Föstudagspóstur 4. október 2024

Heil og sæl.

Hér kemur föstudagspóstur vikunnar.

Þórdís Kolbrún Reykfjörð Gylfadóttir utanríkisráðherra tók þátt í Warsaw Security Forum í Póllandi í vikunni og ræddi þar stöðuna í öryggis- og varnarmálum og stríðið í Úkraínu.

Í lok síðustu viku flutti hún ávarp sitt á allsherjarþingi Sameinuðu þjóðanna í New York þar sem hún fór um víðan völl. Virðing fyrir mannréttindum, einstaklingsfrelsinu og alþjóðalögum voru meginstef í ávarpi ráðherra. Þá þakkaði hún Jens Stoltenberg fyrir vel unnin störf á stóli framkvæmdastjóra Atlantshafsbandalagsins og óskaði arftaka hans, Mark Rutte, góðs gengis í komandi verkefnum. Jörundur Valtýsson, fastafulltrúi Íslands gagnvart Atlantshafsbandalaginu, gerði slíkt hið sama.

Þá fengum við heldur betur góðan hóp í heimsókn til okkar en níunda ræðismannaráðstefna Íslands fór fram í vikunni. Alls tóku 129 ræðismenn frá 71 landi þátt í ár. Ráðstefnan var einstaklega vel heppnuð og var þessum burðarásum íslensku utanríkisþjónustunnar meðal annars þakkað fyrir þeirra ómetanlegu störf í þágu Íslands í ávörpum utanríkisráðherra og ráðuneytisstjóra utanríkisráðuneytisins.

  

Þá var fjallað um pólitískt samráð Íslands og Filippseyja sem fram fór í tengslum við ráðherraviku allsherjarþingsins. Bergdís Ellertsdóttir, staðgengill ráðuneytisstjóra, og Davíð Logi Sigurðsson sóttu fundinn fyrir Íslands hönd.

 

Fulltrúar ríkja sem skipa ríkjahóp um sprengjuleit- og eyðingu í Úkraínu, áttu sameiginlegan fund í Reykjavík dagana 26. og 27. september. Ísland og Litáen leiða vinnu hópsins sem styður við þjálfun og kaup á margvíslegum búnaði til sprengjuleitar og eyðingar.

  

Þá voru árásir Írana á Ísrael fordæmdar og deiluaðilar hvattir til að sýna stillingu og draga úr stigmögnun.

Félag fyrrverandi þingmanna leit við í sendiráðinu í Berlín í vikunni. Líflegar umræður áttu sér stað um alþjóðamálin og hið trausta samband Íslands og Þýskalands.

  

Auðunn Atlason, sendiherra í Berlín, tók á móti fulltrúum fyrirtækja í heilbrigðisgeiranum, sem voru í Berlín á vegum Business Sweden og Íslandsstofu, til að leggja hornstein að samstarfi og gagnkvæms þekkingarflutnings á sviði stafrænna lausna í heilbrigðismálum.

  

Þá voru Auðunn og Nicole Hubert, starfsmaður sendiráðsins, viðstödd tónleika Svavars Knúts í Berlín. Martin Hermannsson körfuboltalandsliðsmaður fylgdist einnig með.

 

Sendiráðið í Brussel, sem jafnframt gegnir hlutverki fastanefndar gagnvart Evrópusambandinu, fékk stjórn Samtaka atvinnulífsins í heimsókn í sendiráðið. Meðal annars var rætt um hvernig breytt viðhorf í alþjóðamálum hafa í vaxandi mæli áhrif á stefnumótun Evrópusambandsins og hvernig sendiráðið skipuleggur sig í að verja hagsmuni Íslands í EES-samstarfinu og gagnvart ESB.

  

Hátíðahöld vegna 30 ára afmæli EES-samningsins héldu áfram, nú hjá EFTA-dómstólnum í Lúxemborg.

 

Harald Aspelund, sendiherra í Helsinki, tók þátt í Helsinki Security Forum 27. til 29. september. Með honum á myndinni er Pia Hansson, forstöðukona Alþjóðamálastofnunar Háskóla Íslands.

  

 

Harald tók einnig þátt á fundum með fulltrúum frá NB8-ríkjunum í Tallinn. Alþjóðamál og öflug samskipta Norðurlandanna og Eystrasaltsríkjanna voru til umræðu.

  

Sendiráðið í Helsinki stóð þá fyrir fundi ásamt sendiráðinu í Kanada, Icelandair og Íslandsstofu.

 

Sendiráðið í Kaupmannahöfn vakti athygli á viðburði í Copenhagen Business School í tengslum við opinbera heimsókn Höllu Tómasdóttur, forseta Íslands, til Danmerkur í næstu viku.

 

Í Lilongwe var athygli vakin á verkefni sem snýr að því að bregðast við þurrkum í Malaví sem ógnað hafa milljónum manna og fæðuöryggi í landinu.

  

Sendiráðið í Ottawa gerði upp samráðsfundi utanríkisráðherra Norðurlandanna og Kanada í kringum allsherjarþing Sameinuðu þjóðanna en þeir áttu sér stað í New York og Kanada.

  

Sendiráðið í París, sem annast fyrirsvar gagnvart Spáni, óskaði Astrid Helgadóttur, ræðismanni í Barcelona, til hamingju með að hafa verið sæmd heiðursmerki utanríkisþjónustunnar í kringum ræðismannaráðstefnuna í Reykjavík.

  

Sendiráðið í Stokkhólmi fylgdist með bókamessunni í Gautaborg. Rithöfundurinn Yrsa Sigurðardóttir var á meðal viðstaddra.

  

Sendiráðið í Tókýó leitar að nýjum starfsmanni.

  

Stefán Haukur Jóhannesson, sendiherra í Tókýó, tók þátt í ljósmyndasamkeppni. Framlag hans má sjá hér.

Friðrik Jónsson, sendiherra í Varsjá, fundaði með úkraínska ræðismanninum Kostyantyn Malovany sem staddur var á Íslandi í tengslum við ræðismannaráðstefnuna fyrr í vikunni.

 

Friðrik var ráðherra sömuleiðis innan handar í tengslum við Warsaw Security Forum.

Hannes Heimisson, aðalræðismaður okkar í Færeyjum, hitti Heðin Mortensen, borgarstjóra í Þórshöfn á dögunum og fór vel á með þeim.

  

Þá tók Hannes á móti Norðurlandadeild Rauða krossins í Þórshöfn.

  

Norrænu sendiráðin í Washington D.C. héldu sameiginlegan bókmenntaviðburð. Rithöfundurinn Hildur Knútsdóttir tók þátt fyrir hönd Íslands.

 

Það styttist í kosningar í mannréttindaráð Sameinuðu þjóðanna en Ísland er þar í framboði. Fastanefndin í Genf hefur staðið í ströngu og telur niður dagana.

Þá fór fram sameiginleg móttaka Íslands og Sviss sem bjóða sig bæði fram, en þó innan sitthvors ríkjahópsins. Einar Gunnarsson fastafulltrúi og okkar fólk í Genf tóku þátt í yfirstandandi mannréttindalotu. Fulltrúar fastanefndarinnar í New York ræddu við fulltrúa frá Singapúr og héldu vinnustofu. Sendiráðið í Kampala þakkaði Muni Safieldin, fulltrúa UNICEF í Úganda, fyrir staðfastan stuðning hans í garð barna í landinu á undanförnum árum. Þá vakti sendiráðið í Kampala athygli á verkefnum samtakanna Defend Defenders í Úganda.

Fleira var það ekki þessa vikuna og óskum við ykkur góðrar helgar.

Upplýsingadeild.

Efnisorð

Föstudagspóstur

Hafa samband

Ábending / fyrirspurn
Ruslvörn
Vinsamlegast svaraðu í tölustöfum

Ef um er að ræða áríðandi erindi til borgaraþjónustu utanríkisráðuneytisins þá skal senda póst á [email protected]

Upplýsingar um netföng, símanúmer og staðsetningu ráðuneyta