Unnið að brúun bilsins á milli fæðingarorlofs og leikskóla
Forsætisráðherra skipaði í síðustu viku aðgerðahóp um brúun bilsins á milli fæðingarorlofs og leikskóla. Hópnum er m.a. falið að horfa heildstætt á umönnun og menntun barna og skoða hvort þörf sé á kerfisbreytingum til að loka umönnunarbilinu.
Hópurinn er skipaður til að fylgja eftir yfirlýsingu ríkisstjórnarinnar og Sambands íslenskra sveitarfélaga frá 7. mars sl., sem birt var í tengslum við undirritun kjarasamninga á almennum vinnumarkaði. Í yfirlýsingunni segir að á samningstíma þeirra verði stefnt að því að brúa bilið milli fæðingarorlofs og leikskóla.
Hópurinn er skipaður fulltrúum forsætisráðuneytis, mennta- og barnamálaráðuneytis, félags- og vinnumarkaðsráðuneytis, innviðaráðuneytis, Samtaka atvinnulífsins, samtaka launafólks (ASÍ, BHM, BSRB og KÍ) og Sambands íslenskra sveitarfélaga.
Verkefni aðgerðahópsins felst í að vinna að tímasettri áætlun um aðgerðir til að loka umönnunarbilinu á samningstíma gildandi kjarasamninga á almennum vinnumarkaði.
Aðgerðahópinn skipa:
- Hildur Björnsdóttir, án tilnefningar, formaður
- Bjarki Vigfússon, fulltrú forsætisráðuneytis
- Hrafnkell Hjörleifsson, fulltrúi mennta- og barnamálaráðuneytis
- Steinunn Valdís Óskarsdóttir, fulltrúi félags- og vinnumarkaðsráðuneytis
- Steinunn Rögnvaldsdóttir, fulltrúi innviðaráðuneytis
- Anna Hrefna Ingimundardóttir, fulltrúi Samtaka atvinnulífsins
- Arnaldur Grétarsson, fulltrúi ASÍ
- Kolbrún Halldórsdóttir, fulltrúi BHM
- Sonja Ýr Þorbergsdóttir, fulltrúi BSRB
- Haraldur Freyr Gíslason, fulltrúi KÍ
- Heiða Björg Hilmisdóttir, fulltrúi Sambands íslenskra sveitarfélaga
Samkvæmt skipunarbréfi skal aðgerðahópurinn skila skýrslu ásamt tillögum eigi síðar en 1. apríl 2025.