Þátttaka forsætisráðherra á þingi Norðurlandaráðs
Bjarni Benediktsson forsætisráðherra var viðstaddur setningu þings Norðurlandaráðs í Ráðhúsi Reykjavíkur í dag. Forsætisráðherra tók þar þátt í leiðtogaumræðum með forsætisráðherrum Norðurlandanna.
Á leiðtogafundinum var rætt um hvernig best megi tryggja frið og öryggi á norðurslóðum og Norðurlöndum. Í ávarpi sínu ræddi forsætisráðherra þá miklu geópólitísku spennu sem ríkir í alþjóðakerfinu og auka óvissu í alþjóðasamskiptum.
„Þannig reynir verulega á þær stofnanir og sáttmála sem standa vörð um þá meginskyldu okkar að tryggja öryggi borgaranna. Þess vegna er brýnt að byggja upp traust á ný í ljósi þeirra margþættu viðfangsefna sem við stöndum frammi fyrir,“ sagði forsætisráðherra m.a. í ávarpi sínu.
Fyrr í dag funduðu forsætisráðherrar Norðurlandanna. Á fundinum var samþykkt yfirlýsing um að hraða aðgerðum til að stuðla að samþættari Norðurlöndum og tryggja frjálsa för fólks yfir landamæri, auka samstarf í baráttunni gegn skipulagðri glæpastarfsemi og um ábyrga innflytjendastefnu.
Blaðamannafundur forsætisráðherranna var haldinn í Skála þar sem forsætisráðherrar Íslands, Svíþjóðar, Danmerkur, Noregs, Finnlands og Álandseyja fluttu stutt ávörp og svöruðu spurningum fjölmiðlafólks.