Fríverslunarsamningur við Tæland í höfn

Ísland hefur náð samkomulagi um fríverslunarsamning við Tæland. Samningurinn kveður á um tollfríðindi fyrir allar helstu útflutningsafurðir Íslands til Tælands. Samningurinn tryggir meðal annars fullt tollfrelsi inn á Tælandsmarkað fyrir flök af laxi, þorsk, grálúðu og loðnuhrogn, vélbúnað til matvælaframleiðslu og stoðtæki.  

„Fríverslunarsamningur við Tæland mun bæta samkeppnisstöðu íslenskra útflytjenda á hinum stóra og ört vaxandi Tælandsmarkaði. Samningurinn fylgir þannig eftir útflutningsstefnu Íslands, sem unnin var í samstarfi við atvinnulífið. Þar var lögð áhersla á að bæta aðgang íslenskra fyrirtækja að mörkuðum Suðaustur-Asíu. Þar höfum við náð góðum árangri síðustu ár með fríverslunarsamningum við Indland, Filippseyjar og Indónesíu. Þetta er sérstaklega mikilvægt nú þegar framleiðsla og viðskiptaumhverfi Asíu er að taka örum breytingum og tryggir að íslensk fyrirtæki búi ávallt við bestu viðskiptakjör. Þannig tryggjum við hagsmuni Íslands,“ segir Þórdís Kolbrún Reykfjörð Gylfadóttir utanríkisráðherra.

Samningurinn kveður einnig á um samstarfsverkefni milli íslenskra og tælenskra aðila á sviði sjálfbærra fiskveiða og fiskveiðistjórnunar.  Samningurinn veitir íslenskum fyrirtækjum ennfremur víðtækari heimildir til fjárfestinga á Tælandi, auk þess að bæta aðgang íslenskra þjónustufyrirtækja að tælenskum þjónustumarkaði. Þá fjallar samningurinn meðal annars um vernd hugverka og  sjálfbær viðskipti. 

Viðræðunum lauk í dag, en þær hafa verið sameiginlegar með hinum EFTA-ríkjunum, Liechtenstein, Noregi og Sviss. Samningaviðræður tóku rúmlega tvö ár. Ætlunin er að undirrita samninginn formlega í upphafi nýs árs en hann mun taka gildi þegar Ísland og Tæland hafa lokið fullgildingarferli sínu.