Nýr reiknigrundvöllur við tryggingafræðilega athugun hjá lífeyrissjóðum á líkum á sambúð og barneignum
Hari Fjármála- og efnahagsráðuneytið hefur móttekið tillögur frá Félagi íslenskra tryggingastærðfræðinga um nýjar maka- og barnalíkur til að nota við tryggingafræðilegar athuganir lífeyrissjóða. Hinar nýju forsendur voru samþykktar á félagsfundi félagsins 4. desember. Fram kemur í erindi félagsins að töflurnar, sem ætlað er að koma í stað eldri taflna, séu grundvallaðar á gögnum frá Hagstofu Íslands sem byggjast á árunum 2019-2023 með upplýsingum um hjúskaparstöðu og fjölda barna. Mat félagsins er að áhrif nýrra taflna á lífeyrissjóði verði minniháttar. Áætlað er að skuldbindingar lífeyrissjóða vegna makalífeyris hækki lítillega, sem rekja megi til hærri lífaldurs, og að skuldbindingar sjóða vegna barnalífeyris lækki vegna lægri barneignalíka.
Í reglugerð um skyldutryggingu lífeyrisréttinda og starfsemi lífeyrissjóða, er kveðið á um að við mat á líkum þess að sjóðfélagi verði í hjónabandi eða annarri sambúð á hverju aldursári í framtíðinni, skuli stuðst við tíðni hjónabands eða sambúðar á hverju aldursári samkvæmt töflum sem útgefnar eru af ráðherra að fengnum tillögum Félags íslenskra tryggingastærðfræðinga. Þá er í reglugerðinni kveðið á um að við mat á líkum þess að sjóðfélagi eigi börn á hverju aldursári í framtíðinni, skuli stuðst við fjölda og aldur barn á framfæri á hverju aldursári foreldra samkvæmt töflum sem útgefnar eru af ráðherra að fengnum tillögum Félags íslenskra tryggingastærðfræðinga.
Ráðuneytið fellst á tillögur félagsins og tilkynnir hér með að við næstu tryggingfræðilegu athugun hjá lífeyrisjóðum skuli byggt á tilvitnuðum töflum.