Verkefni Veðurstofunnar í brennidepli

Jóhann Páll Jóhannsson, umhverfis-, orku- og loftslagsráðherra, fundaði í dag með stjórnendum og sérfræðingum Veðurstofu Íslands.

Farið var yfir áskoranir undanfarinna missera vegna veðurfars og náttúruváraatburða á borð við jarðhræringar á Reykjanesi og nýlegar hreyfingar í Bárðarbungu og Ljósufjöllum. Á fundinum var einnig farið yfir viðbragðsáætlanir og sviðsmyndir sem Veðurstofan hefur unnið að.

Þá ræddi ráðherra við framkvæmdastjórn Veðurstofunnar um framtíðarsýn stofnunarinnar og áskoranir og hvernig Veðurstofan getur stutt stjórnvöld og þjónustað samfélagið í mikilvægum verkefnum framtíðarinnar.

Jóhann Páll Jóhannsson, umhverfis-, orku- og loftslagsráðherra: „Veðurstofa Íslands gegnir ómissandi hlutverki eins og við erum sífellt minnt á. Það er metnaðarmál hjá ríkisstjórn Kristrúnar Frostadóttur að efla starfsemi stofnunarinnar og styrkja grundvöll hennar til framtíðar. Auk þess er löngu tímabært að unnin verði heildstæð stefna um náttúruvá á Íslandi með skýrri forgangsröðun. Þetta er eitt af þeim verkefnum sem við vinnum nú að í umhverfis-, orku- og loftslagsráðuneytinu.“