Opið almennt útboð á hlut ríkisins í Íslandsbanka 

Fyrirhugað er að selja eignarhlut ríkisins í Íslandsbanka, um 42,5% hlutabréfa bankans, á næstu misserum. Salan fer fram með útboði þar sem almenningur hefur forgang samkvæmt lögum nr. 80/2024 sem samþykkt voru sl. sumar um ráðstöfun á eftirstandandi eignarhlut.
Lögin tryggja að við framkvæmdina á útboðsferlinu verði viðhöfð hlutlægni, hagkvæmni, jafnræði og gagnsæi. Að fenginni ráðgjöf telur fjármála- og efnahagsráðuneytið að unnt sé að bæta árangur útboðs með breytingum á fyrirkomulagi þess. Í frumvarpsdrögum sem birst hafa í samráðsgátt eru lagðar til breytingar sem fela í sér að þriðju tilboðsbókinni er bætt við þær tvær sem fyrirhugaðar voru (tilboðsbók C).

Tilboðsbók A: Aðeins einstaklingum er heimilt að gera tilboð í tilboðsbók A, fyrir allt að 20 m.kr. Gengið í tilboðsbók A verður á föstu verði. Verð miðast við meðalverð hlutabréfa í Íslandsbanka hf. síðustu 15 daga fyrir birtingu útboðslýsingar, eða síðasta dagslokagengi, með allt að 5% afslætti. Úthlutanir í A-bók verða ekki skertar vegna hinna tilboðsbókanna, en komi til skerðingar, verður það gert hlutfallslega. Þannig verður almenningi tryggt lægsta verð og forgang við úthlutun.

Tilboðsbók B: Lögaðilar og almenningur geta boðið í hluti í bankanum í tilboðsbók B. Þar er lágmarkskaupverð 2 m.kr. Úthlutun er á grundvelli verðs en verðmyndun fer fram með jafnvægisútboði samkvæmt aðferðafræði sem jafnan er kennd við Holland. Verðið má þó aldrei verða lægra en verð A-bókarinnar. Þar sem úthlutun verður á grundvelli verðs en verðið mun þó aldrei fara niður fyrir fast verð A-bókarinnar. Úthlutanir til tilboðsbókar B verða ekki skertar vegna tilboðsbókar C.

Tilboðsbók C: Stórir eftirlitsskyldir fagfjárfestar geta gert tilboð í tilboðsbók C. Þar er tekið við tilboðum fyrir að lágmarki 300 m.kr., í kjölfar markaðsþreifinga fyrir útboð. Markaðsþreifingar miða að því að fá stóra eftirsóknarverða fagfjárfesta að borðinu til að tryggja sem mesta eftirspurn í útboðinu. Þessir aðilar verða að uppfylla það skilyrði að samanlögð fjárhæð eigna þeirra í stýringu sé jafnvirði 70 milljarða króna eða hærra. Verð í tilboðsbók C er hið sama og myndast í tilboðsbók B.

Með þessum breytingum er þátttaka allra fjárfestahópa tryggð. Uppfært fyrirkomulag útboðs tryggir einstaklingum áfram lægsta verð og forgang á úthlutun, hefur gagnsæja verðmyndun í B-bók sem einnig gildir fyrir C-bók, veitir stórum eftirlitsskyldum fagfjárfestum hefðbundnara úthlutunarferli í C-bók og er talið geta aukið selt magn. 

• Breyting á lögum um ráðstöfun eignarhlutar ríkisins í Íslandsbanka í samráðsgátt