Hnattrænar áskoranir og málefni Úkraínu rædd á fundi með forseta Alþjóðabankans

Hlutverk Alþjóðabankans á tímum örra breytinga, skertrar fjármögnunar til  þróunarsamvinnu og erfiðrar skuldastöðu fjölmargra þróunarríkja var meðal þess sem rætt var á fundi fulltrúa kjördæmis Norðurlandanna og Eystrasaltsríkjanna (NB8) í Alþjóðabankanum með Ajay Banga, forseta bankans, í Stokkhólmi í dag. Vandinn sem fátækustu ríkin standa frammi fyrir er gríðarlegur og fer vaxandi á sama tíma og dregið hefur úr stuðningi við þau.  

„Alþjóðabankinn er einstök stofnun og hefur eflst mikið á undanförnum árum þökk sé metnaðarfullu umbótarferli undir stjórn  Ajay Banga. Mikilvægi Alþjóðabankans í að takast á við hnattrænar áskoranir á borð við loftslagsvandann, afleiðingar aukinna átaka og ójöfnuðar hefur sjaldan verið meiri, ekki síst í ljósi samdráttar í fjármögnun þróunarsamvinnu, en að sama skapi hefur hann aldrei verið jafn vel í stakk búinn,“ segir Þorgerður Katrín Gunnarsdóttir utanríkisráðherra. 

Auk þess voru málefni Úkraínu rædd en einhugur er í kjördæminu um sterkan áframhaldandi stuðning og samstöðu. Alþjóðabankinn gegnir veigamiklu hlutverki í stuðningi við Úkraínu, einna helst hvað varðar viðhald og enduruppbyggingu á innviðum sem hafa sætt skemmdum eða eyðilagst vegna innrásarstríðs Rússlands. Þá er bankinn lykilaðili í að halda uppi grunnþjónustu og er náinn samstarfsaðili úkraínskra stjórnvalda að umbótum og baráttu gegn spillingu. 

„Stuðningur við Úkraínu í gegnum Alþjóðabankann er hryggjarstykki í stuðningi Íslands við enduruppbyggingu landsins. Ásamt umfangsmikilli getu til enduruppbyggingar er bankinn í einstakri stöðu til að hraða enn frekar árangursríkri og metnaðarfullri umbótavegferð úkraínskra stjórnvalda,“ segir Þorgerður Katrín.