Hoppa yfir valmynd

Haus fyrir smærri skjái

Merki Stjórnarráðs Íslands Stjórnarráð Íslands
18. október 2024 Utanríkisráðuneytið

Föstudagspóstur 18. október 2024

Heil og sæl.

Hér kemur föstudagspóstur vikunnar.

Utanríkisráðherrar Norðurlandanna og Eystrasaltsríkjanna heimsóttu Úkraínu í vikunni. Andrii Sybhia, utanríkisráðherra Úkraínu, átti fund með ráðherrunum í hafnarborginni Odesa. Heimsóknin til Úkraínu kom í framhaldi af heimsókn til Moldóvu á þriðjudag þar sem Norðurlöndin og Eystrasaltsríkin undirstrikuðu stuðning sinn við lýðræðislegar og efnahagslegar umbætur í Moldóvu á sama tíma og landið hefur mátt þola ítrekaðar fjölþáttaárásir af hálfu Rússlands. Martin Eyjólfsson ráðuneytisstjóri utanríkisráðuneytisins tók þátt í heimsókninni í fjarveru utanríkisráðherra Íslands.

  

Hringborð Norðurslóða fer fram í þessari viku en Þórdís Kolbrún Reykfjörð Gylfadóttir utanríkisráðherra hitti Lisu Murkowski, öldungadeildarþingmann frá Alaska, í tengslum við það.

Tvísköttunarsamningur milli Íslands og Brasilíu var undirritaður í húsakynnum ráðuneytisins í vikunni. Samningurinn, sem nær til tekjuskatta, var undirritaður af Bergdísi Ellertsdóttur, sendiherra og staðgengli ráðuneytisstjóra, fyrir hönd Íslands og Rodrigo de Azeredo Santos, sendiherra, fyrir hönd Brasilíu.

  

Yfirmenn hermála Norðurlandanna funduðu í síðustu viku um frekari útfærslu á varnasamstarfi ríkjanna og hvernig hægt er að auka sameiginlega getu og viðbragð innan ramma NORDEFCO. Fundurinn fór fram í Keflavík og var haldinn í samstarfi Íslands og Danmerkur, sem fer með formennsku í norræna varnarsamstarfinu í ár.

  

Greint var frá viðamikilli og óháðri úttekt fyrirtækisins GOPA á starfi GRÓ skólanna, það er Jafnréttisskólans, Jarðhitaskólans, Landgræðsluskólans og Sjávarútvegsskólans, á árunum 2018–2023 en hún staðfestir góðan árangur af starfi þeirra. Í úttektinni eru lagðar fram 37 tillögur til úrbóta er varða skólana og GRÓ miðstöðina.

  

Nóg er um að vera hjá sendiráðinu í Berlín sem tekur á mánudag á móti forsetum og utanríkisráðherrum Norðurlandanna og Þýskalands í tilefni af 25 ára afmæli sendiráða Norðurlandanna í Berlín. Við hvetjum fólk til að fylgjast með frásögn sendiráðsins í næstu viku á samfélagsmiðlum. Lokað verður hjá sendiráðinu mánudaginn 21. október og þriðjudaginn 22. október vegna dagskrárinnar í kringum afmælið.

  

  

Þá hitti Auðunn Atlason, sendiherra í Berlín, Sviatlana Tsikhanouskaya, leiðtoga stjórnarandstöðunnar í Belarús, annars vegar og Cem Özdemir, landbúnaðarráðherra Tyrklands, hins vegar.

Sendiráðið í Helsinki vakti athygli á afhendingu finnska fyrirtækisins Kewatec á björgunar- og leitarbáti til Slysavarnafélagsins Landsbjargar.

  

Elín Rósa Sigurðardóttir, skrifstofustjóri þróunarsamvinnuskrifstofu utanríkisráðuneytisins og Pálína B. Matthíasdóttir, deildarstjóri tvíhliða þróunarsamvinnu, heimsóttu í vikunni samstarfshéruð Íslands í Úganda, Namayingo og Buikwe, og fengu þar innsýn inn í það viðamikla starf sem er unnið fyrir tilstilli héraðsnálgunar Íslands, meðal annars á sviði menntamála og vatns- og hreinlætis. Í Namayingo kynntu þær sér líka samstarfsverkefni Íslands og Mannfjöldasjóðs Sameinuðu þjóðanna, UNFPA, gegn fæðingarfistli og hittu konur sem notið hafa góðs af því.

 

Sendiráðið í Kaupmannahöfn fjallaði um og birti myndir frá Nordisk Kulturnat síðastliðinn föstudag. Að þessu sinni tóku öll Norðurlöndin þátt í að móta dagskrána en boðið var upp á veitingar frá veitingastöðum sem leggja áherslu á sjálfbærni og notkun á staðbundnum hráefnum, auk þess að vinna gegn matarsóun. Gestir og gangandi gátu auk þess tekið þátt í samsöng, þegar sungin voru hin ýmsu lög frá Norðurlöndunum og boðið var upp á námskeið í að þæfa íslenska ull.

  

Fulltrúar sendiráðsins í Lilongwe hittu fulltrúa mannréttindanefndar Malaví þar sem staða mannréttindamála í landinu var til umræðu, einkum út frá kynbundinni mismunun og í tengslum við málefni eldra fólks.

  

Sturla Sigurjónsson sendiherra og Drífa Arnþórsdóttir menningarmálafulltrúi sóttu fyrir hönd sendiráðsins í London viðburð í tengslum við frumsýningu á íslensku kvikmyndinni Ljósbroti á kvikmyndahátíðinni London Film Festival í vikunni.

  

PolarExp2024 fór fram í síðustu viku og var haldin í Ilulissat. Um er að ræða stærstu sjávarútvegssýningu sem haldin er á Grænlandi. Um 50 þátttakendur frá Danmörku, Færeyjum, Grænlandi, Íslandi, Kína og Svíþjóð tóku þátt með sýningarbása og sótti Þórður Bjarni Guðjónsson, aðalræðismaður Íslands á Grænlandi, hana.

  

Íslensk sendinefnd var viðstödd ráðstefnu í tengslum við hafrannsóknir og nýsköpun í Ottawa. Hlynur Guðjónsson, sendiherra í Kanada, tók þátt ásamt fulltrúum Matís og Hafró.

  

Fjallað var um mannabreytingar í sendiráðinu í Osló.

  

Unnur Orradóttir Ramette, sendiherra í París, leiddi umræðuhóp á vettvangi OECD um hvernig stjórnvöld geti komið í veg fyrir neikvæð áhrif sem stafað geta af gervigreind.

  

220. framkvæmdastjórnarfundur UNESCO er í fullum gangi en hann stendur yfir frá 9.-23.október. Reglulegir fundir stjórnar fara fram tvisvar á ári. Ísland leggur þar meðal annars áherslu á jafnrétti, loftslagsmál, málefni ungs fólks og stöðu kvenna og stúlkna í Afganistan. Ísland hefur einnig á undanförnum dögum tekið virkan þátt í umræðum um jafnrétti, heimsmarkmið SÞ 4 (menntun), aðgerðir UNESCO á Gaza og ýmis önnur mál.

Ferðasýningin Outside Looking In, Inside Looking Out var opnuð í embættisbústaðnum í París í vikunni. Sýningin var vel sótt af lykilfólki úr myndlistar- og menningargeiranum en hún er samstarfsverkefni Myndlistarmiðstöðvar, Íslandsstofu og sendiskrifstofa Íslands víða um heim. Markmiðið er að kynna nýja kynslóð myndlistarmanna frá Íslandi en á hverjum stað er lögð sérstök áhersla á einn listamann úr hópnum.

  

Sunna Gunnlaugs Trio lékt fyrir gesti í embættisbústaðnum í Stokkhólmi.

  

Bryndís Kjartansdóttir, sendiherra í Stokkhólmi, var viðstödd þegar rithöfundurinn og ljóðskáldið Gyrðir Elíasson tók á móti Tranströmer-verðlaununum.

  

Sendiráðið í Varsjá tók í síðustu viku á móti Lilju Alfreðsdóttur menningar- og viðskiptaráðherra og sendinefnd sem heimsótti meðal annars menningarmálaráðuneyti og tækni- og þróunarmálaráðuneyti Póllands.

  

Friðrik Jónsson og fulltrúar sendiráðsins í Varsjá hittu þá pólska þingmenn þar sem samband Íslands og Póllands var til umræðu.

  

Þórir Ibsen sendiherra í Peking sótti hádegisverðarfund með Catherine Russell, framkvæmdastjóra UNICEF, í boði Amakobe Sande, fulltrúa UNICEF í Kína. Á fundinum voru sendiherrar þeirra ríkja sem sitja í framkvæmdastjórn UNICEF og var rætt um starfsemi stofnunarinnar í Kína.

Inga Dóra Pétursdóttir, staðgengill sendiherra í Peking, flutti ávarp fyrir hönd Norðurlandanna við opnun hinnar árlegu viðskiptaráðstefnu Kína og Norðurlandanna í Wuhan. Ýmis norræn fyrirtæki taka þátt í kaupstefnunni, þar á meðal Össur, Controlant og samstarfsaðili Icelandair. Jörundur Valtýsson, fastafulltrúi Íslands hjá Atlantshafsbandalaginu, hefur heilsað upp á og fundað með fjölmörgum kollegum á fyrstu mánuðum hans í nýju starfi. Áherslur Íslands í loftslagsmálum sem hluti af þróunarsamvinnustefnu okkar báru á góma í New York. Stefán Haukur Jóhannesson, sendiherra í Tókýó, ávarpaði háskólanemendur og fór yfir áherslur Íslands í jafnréttismálum og mikilvægi valdeflingar kvenna. Sendiráðið í Washington D.C. fékk góðar heimsóknir í vikunni, annars vegar frá nemendum í Fjölbrautaskólanum í Garðabæ og hins vegar frá fjórum háskólanemum frá Catholic University of America. Starfsfólk sendiráðsins kynnti fyrir nemendunum fjölbreytt starf sendiráðsins og gaf þeim innsýn inn í samskipti Íslands og Bandaríkjanna.

Fleira var það ekki þessa vikuna. Góða helgi!

Upplýsingadeild.

Efnisorð

Föstudagspóstur

Hafa samband

Ábending / fyrirspurn
Ruslvörn
Vinsamlegast svaraðu í tölustöfum

Ef um er að ræða áríðandi erindi til borgaraþjónustu utanríkisráðuneytisins þá skal senda póst á [email protected]

Upplýsingar um netföng, símanúmer og staðsetningu ráðuneyta