2. september 2020 Fjármála- og efnahagsráðuneytið, Heilbrigðisráðuneytið, Háskóla-٫ iðnaðar- og nýsköpunarráðuneytið

12 verkefni fjármögnuð í fjárfestingarátaki um nýsköpun í heilbrigðisþjónustu

Tólf verkefni fá fjármögnun úr fjárfestingarátaki um nýsköpun í heilbrigðisþjónustu sem nemur um 148 milljónum króna. Markmið átaksins var að auka nýsköpun með þarfir heilbrigðisþjónustu að leiðarljósi og fjölga á sama tíma störfum.

Mikill áhugi var á verkefninu og alls sóttu 48 opinberir aðilar í samvinnu við fyrirtæki um fjárfestingu til þróunarverkefna innan heilbrigðiskerfisins. Meðal þeirra verkefna sem fengu fjármögnun var DNA hraðgreiningarlausn, sem m.a. er hugsuð til að greina Covid-19 og app fyrir innlagða sjúklinga sem mun gera sjúklingum kleift að nálgast í gegnum smáforrit upplýsingar um innlögn og komu á spítala.

Valnefnd, sem skipuð var af fjármála- og efnahagsráðherra, atvinnuvega- og nýsköpunarráðherra og heilbrigðisráðherra mat verkefnin út frá nýsköpunargildi, áhrifum á heilbrigðisþjónustu, framkvæmd, markmiðum og árangri.

Eftirfarandi verkefni fengu fjármögnun úr fjárfestingarátakinu:

Heilbrigðisstofnun	Samstarf við	Heiti verkefnis	Fjárfestingarupphæð
Landspítali	ArcanaBio	DNA hraðgreiningar og fjöldagreiningar fyrir SARS-CoV-2 og aðra sýkla.	14.975.000
Heilbrigðisstofnun Suðurlands	Kolibri	Hugbúnaðarlausn fyrir samvinnu við meðhöndlun nýrnasjúkra.	15.000.000
Landspítali	Risk	Áhættureiknir á augnsjúkdómum vegna sykursýki.	14.850.000
Landspítali	Advania	Smáforrit fyrir innlagða sjúklinga - skjólstæðingurinn í öndvegi.	14.839.382
Landspítali	Heilsugreind	Hugbúnaður til að halda utan um rekjanlegt og tímasett ferli sjúklinga sem greinast með brjóstakrabbamein.	15.000.000
Landspítali	Sidekick Health.	Rafræn vöktun og fræðsla með smáforriti fyrir krabbameinssjúklinga á ónæmisörvandi meðferð.	14.999.979
Landspítali	Origo, Geðhjálp, Trans Ísland, Embætti Landlæknis.	Rafræn samskipti milli sjúklinga og fagaðila geðþjónustu.	9.900.000
Sjúkrahúsið á Akureyri	Origo og Embætti Landslæknis	Eigin saga sjúklings - ritaðu þína eigin sjúkraskrá.	15.000.000
Heilbrigðisstofnun Suðurlands	Sjónlag	Nútímavædd augnlæknaþjónusta á landsbyggðinni – pilot í Vestmannaeyjum.	9.950.000
Landspítali	Fleygiferð	Leviosa - nútímalegt sjúkraskráningarviðmót á Landspítala.	14.972.500
Landspítali	Heilsugreind	Þróun spálíkans fyrir gjörgæslur á Landspítala.	5.000.000
Landspítali	Beanfee	Ný leið í atferlisþjálfun ungmenna á BUGL.	3.425.927

Var því beint til stofnana sem fá fjárfestingu að tryggja eftir fremsta megni að verkefnin geti nýst öðrum stofnunum heilbrigðisráðuneytisins í samræmi við markmið átaksins um jákvæð áhrif á þróun heilbrigðismála hér á landi og auka skilvirkni, samvinnu og samhæfingu þjónustunnar þvert á heilbrigðisstofnanir.

Í valnefnd fjárfestingarátaksins sátu:

Andri Heiðar Kristinson, framkvæmdarstjóri Stafræns Íslands, tilnefndur af fjármála- og efnahagsráðherra, jafnframt formaður,
Hildur Georgsdóttir, lögfræðingur hjá Ríkiskaupum, tilnefnd af fjármála- og efnahagsráðherra,
Hlynur Hreinsson, sérfræðingur í fjármála- og efnahagsráðuneyti, tilnefndur af fjármála- og efnahagsráðherra,
Ásthildur Knútsdóttir, skrifstofustjóri í heilbrigðisráðuneyti, tilnefnd af heilbrigðisráðuneyti,
Sigríður Jónsdóttir, sérfræðingur í heilbrigðisráðuneyti, tilnefnd af heilbrigðisráðuneyti,
Sigurður Björnsson, sviðstjóri í Rannís, tilnefndur af atvinnuvega- og nýsköpunarráðuneyti,
Hildur Sif Arnardóttir, verkefnastjóri í Nýsköpunarmiðstöð Íslands, tilnefnd af atvinnuvega- og nýsköpunarráðuneyti.

Valferlið fór þannig fram að hvert verkefni var lesið yfir af þremur nefndarmönnum og voru 20 verkefni metin styrkhæf eftir fyrstu yfirferð og þá í framhaldi metin af öllum nefndarmönnum. Fjárfestingu var veitt til verkefna í samræmi við niðurstöðu valnefndar, innan ramma fjárfestingarinnar. Frekari umfjöllun um verkefnin verður birt í lok átaksins í apríl 2021.

Hakkaþon og heilbrigðismót

Fjárfestingarátakið hljóðaði alls upp á 150 m.kr. en því var skipt upp í þrjá þætti. Auk fjármögnunar verkefna var haldið hakkaþon „Hack the crisis Iceland“ þar sem keppt var um besta verkefnið innan fjögurra mismunandi flokka og var nýsköpun í heilbrigðisþjónustu einn þeirra. Verkefnið sem vann í þeim flokki nefnist Futuristics og snýr að því að nota gögn innan Landspítala til þess að spá fyrir um fjölda sjúklinga á bráðamóttöku. Þá var haldið Heilbrigðismót þar sem 16 opinberir aðilar settu fram áskoranir og 32 fyrirtæki kynntu mögulegar lausnir sínar við þeim. Í kjölfarið á því móti urðu til viðskiptasambönd og aðilar sóttu saman um í fjárfestingarátakinu.