• Greiðsluafkoma ríkissjóðs janúar-júlí 2007 (PDF 61K)

Greiðsluuppgjör ríkissjóðs eftir fyrstu sjö mánuði ársins liggur nú fyrir. Samkvæmt uppgjörinu jókst handbært fé frá rekstri um 46,5 millj­arða króna innan ársins, sem er 10 milljörðum hagstæðari útkoma held­ur en á sama tíma í fyrra. Þá er útkoman 59 milljörðum hagstæðari en gert var ráð fyrir í áætlun. Tekj­ur reyndust 36,4 milljörðum hærri en í fyrra á meðan gjöldin hækkuðu um 25,3 milljarða. Hreinn láns­fjárjöfnuður var neikvæður um 22,3 milljarð króna, en jákvæður um 34,1 milljarða á sama tíma í fyrra. Viðsnúningurinn skýr­ist að mestu leyti af 30,3 milljarða kaupum ríkissjóðs á hlut Reykja­vík­ur­borgar og Akur­eyr­arbæjar í Landsvirkjun og eiginfjáraukningu Seðla­banka Íslands með 44 milljarða króna eiginfjárframlagi ríkissjóðs í byrjun maí.

Sjóðstreymi ríkissjóðs janúar – júlí 2007

(Í milljónum króna)

Innheimtar tekjur ríkissjóðs námu 252 ma.kr. fyrstu sjö mánuði þessa árs. Það er 36,4 ma.kr meira en á sama tíma í fyrra, eða 14% aukn­ing sé óreglulegum tekjum sleppt. Ef tekið er tillit til tilfærslu milli mánaða vegna tekjuskatts lögaðila nemur aukningin 18,7%. Skatt­tekjur og tryggingagjöld jukust um 12,1% að nafnvirði. Á sama tíma hækkaði almennt verðlag um 5,4% og raunaukning skatttekna og tryggingargjalda var því 6,7%. Aukning annarra rekstrartekna um 39% milli ára skýrist af auknum vaxtatekjum og öðrum lána­tekjum.

Skattar á tekjur og hagnað námu 85,4 ma.kr. og jukust um 12,3 ma.kr. frá síðasta ári, eða 16,8%. Þar af jókst tekjuskattur einstaklinga um 11,7%, tekjuskattur lögaðila um 30,6% (þá er leiðrétt fyrir fyrrgreindri tilfærslu) og fjármagnstekjuskattur um 49%. Innheimt tryggingagjöld jukust um 6,8% milli ára, og dróst saman sam­an­borið við launavísitölu. Innheimta eignarskatta nam 6,5 ma.kr. sem er 11,5% aukning frá fyrra ári. Þar af námu stimpilgjöld 5,1 ma.kr. en inn­heimta þeirra á árinu hefur aukist um tæpar 600 m.kr frá fyrra ári. Tekj­ur af stimpilgjöldum eru nú orðnar 1,5 ma.kr. hærri en gert var ráð fyrir í fjárlögum fyrir tímabilið janúar–júlí.

Innheimta almennra veltuskatta gefur nokkuð góða mynd af þróun inn­lendrar eftirspurnar. Hún nam 108 ma.kr. fyrstu sjö mánuði ársins og jókst um 8,7% að nafnvirði frá fyrra ári og 3,4% umfram hækkun vísi­tölu neysluverðs. Tekjur af virðisaukaskatti hafa aukist um 11,5% sem jafngildir rúmlega 6% raunaukningu. Vegna lagabreytingar sem fel­ur í sér rýmri greiðslufrest á virðisaukaskatti og aðflutningsgjöldum fer marktækni samanburðar við fyrra ár eftir því hvaða tímabil innan árs­ins er til skoðunar. Þegar litið er á 6 mánaða hreyfanlegt meðaltal veltuskatta kemur fram að raun­breyt­ing er nánast engin milli ára. Af helstu ein­stökum liðum veltutengdra skatta er mest aukning í sköttum á olíu og þungaskatti. Mest lækkun tekna er af vörugjöldum af öku­tækj­um en þau skiluðu 16% minni tekjum en á sama tíma í fyrra.  Nýskráningar bifreiða á fyrstu sjö mánuðum ársins voru 17% færri en á sama tíma 2006. Nýskráning bifreiða er að taka við sér og var júní þriðji hæsti mán­uðurinn frá upphafi og nýskráningar í júlí 20% fleiri en í júlí í fyrra.

Greidd gjöld nema 203,6 milljörðum króna og hækka um 25,3 millj­arða milli ára, eða um 14,2%. Mest aukning er vegna almannatrygginga og velferðarmála 6,7 milljarðar og vegna almennrar opinberrar þjón­ustu 5,6 milljarða. Greiðslur vegna efnahags- og atvinnumála hækka um 3,9 milljarða, greiðslur vegna heilbrigðismála um 4,6 millj­arða og vegna menntamála um tæpa 2 milljarða.

Lántökur ársins nema 53,2 milljörðum króna og hækka um 33,5 millj­arða milli ára, mest vegna 26,9 milljarða lántöku vegna kaupa á Landsvirkjun. 

Tekjur ríkissjóðs janúar – júlí 2007

Gjöld ríkissjóðs janúar – júlí 2007