S&P Global Ratings staðfestir A/A-1 lánshæfiseinkunnir ríkissjóðs – horfur eru áfram stöðugar
GolliAlþjóðlega matsfyrirtækið S&P Global Ratings hefur staðfest A/A-1 lánshæfiseinkunnir ríkissjóðs Íslands með stöðugum horfum.
Í fréttatilkynningu S&P kemur fram að efnahagsbati hafi haldið áfram og að hagkerfið hafi vaxið um meira en 4% árið 2021, sér í lagi vegna sterkrar innlendrar eftirspurnar. S&P telur að stríð Rússlands og Úkraínu muni hafa takmörkuð áhrif á íslenska hagkerfið í ljósi lítilla beinna viðskipta við þessi lönd og almennt takmarkaðrar þarfar fyrir eldsneytisinnflutning. Fyrirtækið telur einnig að bati í afkomu ríkissjóðs muni færast í aukana á yfirstandandi ári og að skuldir hins opinbera, að frádregnum lausafjáreignum, muni ná jafnvægi í um 42% af VLF til miðlungslangs tíma.
Stöðugar horfur endurspegla væntingar S&P um að efnahagsbatinn muni halda áfram og að hagkerfið verði fyrir tiltölulega litlum áhrifum af stríðinu í Úkraínu. Fyrirtækið telur að halli á afkomu hins opinbera muni halda áfram að minnka á næstu árum og að því muni skuldahlutfall hins opinbera, að frádregnum lausafjáreignum, ná jafnvægi. Á sama tíma gerir rúmur gjaldeyrisforði Seðlabankanum kleift að takast á við þrýsting á ytri hlið þjóðarbúsins eða gengisóstöðugleika, skyldu slíkar aðstæður koma upp.
Samkvæmt S&P gæti fyrirtækið hækkað lánshæfiseinkunnir ríkissjóðs ef hagvöxtur verður umfram væntingar. Það myndi líklega gerast samhliða sterkari útflutningsvexti og meiri fjölbreytni í útflutningi sem myndu minnka erlendar skuldir eða sveiflur í viðskiptakjörum Íslands.
Fyrirtækið gæti lækkað lánshæfiseinkunnirnar ef áhrif stríðsins í Úkraínu magnast, til dæmis vegna annarrar-umferðar-áhrifa vegna minni efnahagsumsvifa í helstu viðskiptalöndum í Evrópu eða breytinga í alþjóðlegum ferðavenjum. Hið síðarnefnda gæti einnig gerst ef faraldurinn tæki sig upp á ný, sérstaklega ef um væri að ræða ný og skæðari afbrigði.