Nýjar tölur um greiðslukortaveltu staðfesta þrótt í ferðaþjónustu og einkaneyslu

Nýjar tölur um greiðslukortaveltu benda til þess að neysla ferðamanna á Íslandi sé nokkurn veginn óbreytt milli ára í stað þess að dragast saman. Endurskoðaðar kortaveltutölur sem Seðlabankinn birti í síðustu viku staðfesta meðal annars þrótt í ferðaþjónustu eins og nýverið var vakin athygli á.

Kortaveltutölurnar eru í góðum takti við aðra hagvísa úr ferðaþjónustu. Þegar kemur að stöðu einkaneyslu ríma tölurnar sömuleiðis við mat ráðuneytisins, en hækkun á tölum um innlenda veltu er þó ívið meiri en gert var ráð fyrir, þótt tölurnar staðfesti að vöxtur hennar hafi kólnað mjög frá því fyrir tveimur árum síðan.

Kortavelta ferðamanna 16 milljörðum meiri fyrstu sex mánuði ársins

Fyrirtæki hér á landi hafa í auknum mæli fært sig til erlendra færsluhirða. Í þessum hópi eru nokkur af umsvifamestu ferðaþjónustufyrirtækjum landsins.

Með uppfærðum gögnum reynist kortavelta erlendra ferðmanna á föstu verðlagi vera 16 ma.kr. meiri á fyrstu 6 mánuðum ársins (+12%) en samkvæmt áður birtum tölum. Samdráttur í veltu milli ára er þannig tæpt 1% að raunvirði í stað ríflega 11% samdráttar samkvæmt fyrri tölum. Í júlí síðastliðnum jókst erlend kortavelta að raunvirði um 2% miðað við sama mánuð 2023. Samkvæmt uppfærðum gögnum hefur erlend velta á fyrstu sjö mánuðum ársins þannig verið 0,2% meiri en á sama tíma fyrir ári að raunvirði.

Þetta er í takt við ýmsa aðra hagvísa í ferðaþjónustu er varða fjölda erlendra ferðamanna, fjölda gistinátta, flugumferð, umferð um hringveginn, leigu bíla og fjöldi starfandi í greininni.

Velta innlendra korta eykst

Velta innlendra greiðslukorta á föstu verðlagi gefur góða vísbendingu um einkaneyslu en hún er nú talin 5% meiri (34 ma.kr. ) fyrstu sex mánuði ársins 2024 en samkvæmt eldri tölum. Þannig jókst velta innlendra korta um 3% að raunvirði á fyrri helmingi ársins í stað þess að dragast lítillega saman eins og fyrri gögn gáfu vísbendingar um. Í júlí var veltan 2% meiri en á sama tíma fyrir ári.