Utanríkisráðuneytið styrkir Barnaheill vegna COVID í Sýrlandi

Utanríkisráðuneytið og Barnaheill – Save the Children á Íslandi hafa skrifað undir samning vegna mannúðaraðstoðar í Sýrlandi. Markmiðið er að veita fjármagni í viðbragðssjóð Save the Children International í Sýrlandi með áherslu á aðgerðir vegna COVID-19 heimsfaraldursins sem miða að því að koma í veg fyrir og bregðast við afleiðingum og áhrifum sem faraldurinn hefur á börn og fjölskyldur þeirra.

„Lögð er áhersla á fórnarlömb á vergangi innan Sýrlands, en flóttafólk er sérstaklega berskjaldað fyrir farsóttinni. Í Sýrlandi búa milljónir manna í yfirfullum flóttamannabúðum þar sem hreint vatn og hreinlætisvörur eru ófullnægjandi og ekki hægt að virða kröfu um fjarlægðarmörk. Umfang, alvarleiki og þörfin fyrir aðstoð í landinu er yfirþyrmandi,“ segir Guðrún Helga Jóhannsdóttir aðstoðarframkvæmdastjóri og leiðtogi erlendra verkefna hjá Barnaheillum.

Átökin í Sýrlandi hafa staðið yfir í rúm níu ár. Samkvæmt greiningu Samhæfingarskrifstofu aðgerða Sameinuðu þjóðanna í mannúðarmálum (UNOCHA) þurfa 11,7 milljón manna í landinu á neyðaraðstoð að halda, þar af eru fimm milljónir í brýnni þörf.

Alþjóðasamtök Save the Children hafa rúmlega 100 ára reynslu af vinnu með börnum og fjölskyldum þeirra sem búa við langvarandi neyð vegna stríðsátaka og annarra hörmunga, eins og að styðja uppbyggingastarf að stríði loknu. Samtökin starfa í 120 löndum og markmið þeirra er að breyta lífi barna í heiminum til batnaðar samkvæmt áherslum Barnasáttmála Sameinuðu þjóðanna. Barnheill – Save the Children á Íslandi hafa stutt við átökin Í Sýrlandi með stuðningi utanríkisráðuneytisins undanfarin ár, með framlagi í viðbragðssjóð Sýrlands. Barnaheill hafa starfað í Miðausturlöndum í yfir 60 ár og frá árinu 2012 í Sýrlandi. Barnaheill fylgjast náið með starfinu í Sýrlandi með reglulegum fjarfundum við sérfræðinga á vettvangi en Barnaheill eru ein fárra samtaka sem geta unnið innan landamæra Sýrlands og vinna samtökin náið með samstarfsaðilum sínum í landinu.

Styrkurinn er hluti af samstarfi ráðuneytisins við íslensk félagasamtök. Auglýst var í byrjun árs 2020 eftir umsóknum um styrki vegna þróunarsamvinnuverkefna og mannúðaraðstoðar félagasamtaka. Umsóknarfrestur vegna þróunarsamvinnuverkefna var til 31. mars en hins vegar var sú breyting gerð að enginn umsóknarfrestur er skilgreindur fyrir umsóknir til mannúðaraðstoðar. Það er því opið fyrir umsóknir allt árið svo lengi sem fjárheimildir leyfa. Nánar má lesa um samstarfið á vef stjórnarráðsins.