Nr. 752/2023 Úrskurður
KÆRUNEFND ÚTLENDINGAMÁLA
Hinn 8. desember 2023 er kveðinn upp svohljóðandi
úrskurður nr. 752/2023
í stjórnsýslumáli nr. KNU23100123
Kæra [...]
á ákvörðun
Útlendingastofnunar
I. Kröfur, kærufrestir og kæruheimild
Hinn 19. október 2023 kærði [...], fd. [...], ríkisborgari Kína (hér eftir kærandi), ákvörðun Útlendingastofnunar, dags. 17. október 2023, um að synja honum um vegabréfsáritun til Íslands.
Af kæru má ráða að kærandi krefjist þess að ákvörðun Útlendingastofnunar verði felld úr gildi og fallist verði á beiðni hans um vegabréfsáritun til Íslands.
Fyrrgreind ákvörðun er kærð á grundvelli 7. gr. laga um útlendinga nr. 80/2016 og barst kæran fyrir lok kærufrests.
Lagagrundvöllur
Í máli þessu gilda einkum ákvæði laga um útlendinga, reglugerð um útlendinga nr. 540/2017, ásamt síðari breytingum, ákvæði stjórnsýslulaga nr. 37/1993, reglugerð um vegabréfsáritanir nr. 795/2022, með síðari breytingum, Schengen-samningurinn og verklagsreglur þess samnings.
II. Málsatvik og málsmeðferð
Með umsókn, dags. 10. október 2023, óskaði kærandi eftir vegabréfsáritun til Íslands og Schengen-svæðisins fyrir átta daga dvöl frá 11. til 18. nóvember 2023. Umsókn kæranda var synjað með ákvörðun Útlendingastofnunar, dags. 17. október 2023. Hinn 19. október 2023 barst kærunefnd kæra frá kæranda ásamt fylgigögnum.
III. Málsástæður og rök kæranda
Í kæru vísar kærandi til stöðu sinnar, hann sé kínverskur ríkisborgari og stundi framhaldsnám við háskóla í Bretlandi. Tilgangur umsóknar um vegabréfsáritun hafi verið að ferðast um Ísland og snúa aftur til heimaríkis 18. desember 2023. Kærandi vísar til ákvörðunar í máli sínu þar sem fram komi að ekki hafi verið færð rök fyrir tilgangi og skilyrðum fyrirhugaðrar dvalar, með þeirri viðbótarskýringu að kærandi hafi ekki lagt fram dvalarleyfi í Bretlandi sem gildi a.m.k. þrjá mánuði umfram brottfarardag af Schengen-svæðinu. Kærandi greinir frá ferðaáætlun sinni og kveður tilgang umsóknarinnar eingöngu að ferðast um Ísland en ekki önnur lönd innan Schengen-svæðisins. Dvalarheimild kæranda í Bretlandi renni sannarlega út innan þriggja mánaða frá brottför af Schengen-svæðinu en sé samt sem áður gild í 75 daga frá áætlaðri brottför. Þar að auki hafi kærandi fengið tölvupóst frá utanríkisráðuneytinu þar sem lagt hafi verið fyrir hann að leggja fram flugmiða frá Schengen-svæðinu alla leið til heimaríkis. Kærandi vísar til þess að eftir ferðina til Íslands muni hann skrifa lokaritgerð en skiladagur hennar sé 15. desember 2023. Kærandi eigi síðan bókað flug frá Bretlandi til Kína 18. desember 2023, en bókunin sé á meðal fylgigagna sem lögð voru fram á kærustigi. Loks vísar kærandi til þess að hann vilji upplifa hið fallega Ísland áður en tíma hans í Evrópu ljúki. Eftir komu til heimaríkis muni hann sinna starfsferli sínum og hann viti ekki hvenær honum gefst aftur tækifæri til þess að ferðast til Íslands.
Meðal fylgigagna sem kærandi lagði fram á kærustigi eru flugbókun til heimaríkis frá Bretlandi, hótalbókanir, og skráningarskírteini við háskólann í [...].
IV. Niðurstaða kærunefndar útlendingamála
Samkvæmt 1. mgr. 20. gr. laga um útlendinga þurfa útlendingar að hafa vegabréfsáritun til að koma hingað til lands, nema annað sé ákveðið í reglum sem ráðherra setur. Ríkisborgarar Kína þurfa vegabréfsáritun til Íslands, sbr. viðauka 8 við reglugerð um vegabréfsáritanir. Í 6. mgr. 20. gr. laga um útlendinga koma fram skilyrði til útgáfu vegabréfsáritunar og í 33. gr. reglugerðar um vegabréfsáritanir er tilgreint hvenær synja skuli um vegabréfsáritun. Heimilt er samkvæmt fyrrgreindri 6. mgr. 20. gr. að veita útlendingi vegabréfsáritun sem gildir á öllu Schengen-svæðinu ef grunnskilyrðum a - h liða sömu greinar er fullnægt.
Samkvæmt 7. mgr. 20. gr. laga um útlendinga skal vegabréfsáritun ekki veitt ef ástæða er til að vefengja uppgefinn tilgang ferðar útlendings hingað til lands eða réttmæti upplýsinga sem hann hefur veitt. Er þessi regla áréttuð í 8. mgr. ákvæðisins en þar kemur fram að við mat á umsókn um vegabréfsáritun skuli auk þjóðernis taka tillit til félagslegrar stöðu og hættu á að útlendingur dvelji lengur á Schengen-svæðinu en honum er heimilt. Með aðild að Schengen-samstarfinu tókust íslensk stjórnvöld á hendur skyldu til að fylgja samræmdum reglum um útgáfu vegabréfsáritana. Hafa stjórnvöld sem annast afgreiðslu umsókna um vegabréfsáritanir mótað tilteknar verklagsreglur til að styðjast við, byggðar á efnisreglum Schengen-samningsins. Í athugasemdum með frumvarpi til laga um útlendinga kemur fram að við mat á einstökum atriðum sé nauðsynlegt að taka tillit til reynslu og framkvæmdar annarra Schengen-ríkja. Leiði það af eðli samstarfsins að mikilvægt sé að samræmis sé gætt á þessu sviði svo sömu skilyrði gildi um vegabréfsáritanir á Schengen-svæðinu.
Samkvæmt 33. gr. reglugerðar um vegabréfsáritanir skal með fyrirvara um 1. mgr. 25. gr. reglugerðarinnar synjað um vegabréfsáritun í tilteknum tilvikum. Meðal þeirra tilvika sem tilgreind eru í ákvæðinu er ef umsækjandi getur ekki fært rök fyrir tilgangi eða skilyrðum fyrirhugaðrar dvalar sinnar, sbr. ii.-lið a-liðar ákvæðisins, eða ef rökstudd ástæða sé til að draga í efa að fylgiskjöl, sem umsækjandi leggur fram, séu ósvikin eða að innihald þeirra sé rétt, eða áreiðanleika framburðar umsækjanda eða ásetning hans til að yfirgefa yfirráðasvæði aðildarríkjanna áður en vegabréfsáritunin sem sótt er um rennur út, sbr. b-lið ákvæðisins.
Synjunarform Útlendingastofnunar er staðlað form sem öll þátttökuríki Schengen-samstarfsins notast við. Í forminu er hægt að merkja við reiti á bilinu 1-17, þ.e. ástæður þess að umsóknum sé synjað. Í ákvörðun kæranda er merkt í reit 2 vegna synjunar á umsókn, þ.e. að ekki voru færð rök fyrir tilgangi og skilyrðum fyrirhugaðrar dvalar. Í ákvörðuninni mátti enn fremur finna viðbótarupplýsingar þar sem fram kemur að kærandi hafi ekki lagt fram dvalarleyfi í Bretlandi sem gildi a.m.k. þrjá mánuði umfram brottfarardag frá Schengen-svæðinu. Uppfyllti kærandi þar með ekki skilyrði 20. gr. laga um útlendinga sem og 33. gr. reglugerðar um vegabréfsáritanir.
Með vísan til 21. gr. stjórnsýslulaga var kæranda jafnframt leiðbeint um að hann gæti óskað eftir skriflegum rökstuðningi innan 14 daga frá tilkynningu ákvörðunar. Samkvæmt gögnum málsins liggur ekki fyrir skriflegur rökstuðningur vegna ákvörðunar kæranda.
Meðferð umsóknar kæranda fór fram hjá utanríkisþjónustunni en hún var lögð fram hjá VFS skrifstofunni í Edinborg, sbr. 10. mgr. 20. gr. laga um útlendinga. Þyki skilyrði ekki fyrir hendi til útgáfu áritunar er mál lagt fyrir Útlendingastofnun til ákvörðunar.
Í gögnum málsins liggur m.a. fyrir afrit úr málaskrá Útlendingastofnunar vegna máls kæranda þar sem málsmeðferð umsóknar hans hjá utanríkisráðuneytinu er rakin. Í málaskránni kemur fram að dvalarheimild kæranda í Bretlandi muni ljúka innan þriggja mánaða frá áætluðum brottfarardegi af Schengen-svæðinu. Samkvæmt gögnum málsins muni hann yfirgefa Bretland til heimaríkis 18. desember 2023. Fulltrúi utanríkisþjónustunnar sendi kæranda tölvubréf, dags. 13. október 2023, þar sem fram kemur að dvalarheimild kæranda í Bretlandi þurfi að gilda a.m.k. þremur mánuðum lengur en áætluð brottfarardagsetning af Schengen-svæðinu. Var honum því boðið að leggja fram flugmiða frá Schengen-svæðinu alla leið til heimaríkis. Með tölvubréfi kæranda, dags. 16. október 2023, vísar kærandi til þess að hann hyggist fara aftur til Bretlands að loknu ferðalagi á Íslandi, vegna skrifa lokaritgerðar. Lokaskiladagur hennar sé 15. desember en síðan muni hann fljúga frá Bretlandi til heimaríkis 18. desember 2023.
Líkt og þegar hefur verið rakið eru málsástæður kæranda á kærustigi þær sömu og við meðferð málsins hjá utanríkisþjónustunni. Meðal fylgigagna með umsókn kæranda er afrit af dvalarleyfisskírteini hans í Bretlandi, en gildistími þess er til 30. janúar 2024. Óumdeilt er að áætluð brottför kæranda frá Schengen-svæðinu, miðað við ferðaáætlun og umsókn um vegabréfsáritun, sé innan þriggja mánaða frá lokum gildistíma dvalarheimildar hans í Bretlandi, sbr. b-lið 6. mgr. 20. gr. laga um útlendinga. Kæranda hafi verið boðið að leggja fram flugmiða þess efnis að hann muni yfirgefa Schengen-svæðið alla leið til heimaríkis, en þess í stað hafi kærandi vísað til lokaritgerðar sinnar og áætlaðrar brottfarar frá Bretlandi 18. desember 2023. Í ljósi framangreinds tekur kærunefnd undir það mat Útlendingastofnunar að ekki hafi verið færð rök fyrir tilgangi og skilyrðum fyrirhugaðrar dvalar.
Að öllu framangreindu virtu tekur kærunefnd undir það mat Útlendingastofnunar að kærandi hafi ekki fært rök fyrir tilgangi og skilyrðum fyrirhugaðrar dvalar, sbr. ii-lið a-liðar 1. mgr. 33. gr. reglugerðar um vegabréfsáritanir. Hefur kærandi ekki fullnægt skilyrði b-liðar 6. mgr. 20. gr. laga um útlendinga um gilda dvalarheimild í Bretlandi sem gildir a.m.k. þrjá mánuði yfir gildistíma áritunar né beina brottför af Schengen-svæðinu til heimaríkis. Verður hin kærða ákvörðun um að synja kæranda um vegabréfsáritun til landsins því staðfest.
Úrskurðarorð:
Ákvörðun Útlendingastofnunar er staðfest.
The decision of the Directorate of Immigration is affirmed.
Fyrir hönd kærunefndar útlendingamála,
Valgerður María Sigurðardóttir, varaformaður