Hoppa yfir valmynd

Haus fyrir smærri skjái

Merki Stjórnarráðs Íslands Stjórnarráð Íslands
29. september 2023 Utanríkisráðuneytið

Föstudagspóstur 29. september 2023

Heil og sæl, 

Þá er það uppáhalds iðja okkar hér á upplýsingadeild, að líta yfir liðna viku og gleðjast yfir stóru og smáu sem átt hefur sér stað í utanríkisþjónustunni hér heima og um víða veröld. 

Þórdís Kolbrún Reykfjörð Gylfadóttir utanríkisráðherra flutti ræðu Íslands í allsherjarþingi Sameinuðu þjóðanna um liðna helgi. 

„Við höfum aldrei í mannkynssögunni verið jafn háð hvort öðru eða þurft að reiða okkur jafn mikið á hvort annað. Vandamál sköpuð af fáum geta haft skelfilegar afleiðingar fyrir aðra. Hatursfull orðræða sem notuð er í pólitískum tilgangi í einu ríki getur borist með ljóshraða yfir landamæri og eitrað þjóðfélagsumræðuna í öðrum ríkjum. En það eru líka aðrir og meira upplífgandi þættir sem fylgja þessum veruleika. Lausnir uppgötvaðar í hvaða fjarlæga svæði heims er hægt að flytja og nýta um heim allan á augabragði. Nýjar hugmyndir í menningu, vísindum og pólitískri hugsun virða heldur engin landamæri,“ sagði ráðherra meðal annars í ræðu sinni. 

Ræðuna í heild sinni má hlýða á hér:

Það er skammt stórra högga á milli í dagskrá ráðherra. Á þriðjudag tók hún þátt í sérstökum fundi fastaráðs Öryggis- og samvinnustofnunar Evrópu (ÖSE). Á fundinum var fjallað um framferði Rússlands og misbeitingu þeirra á samstöðureglu stofnunarinnar. Ítrekaði ráðherra nauðsyn þess að samstaða náist um það sem þarf til að halda stofnuninni gangandi en framferði Rússlands gerir stofnuninni sífellt erfiðara um vik að sinna grundvallarstarfsemi sinni. 

Í dag og í gær var ráðherra svo í opinberri heimsókn í Eistlandi. Tilgangur ferðarinnar var að hitta utanríkisráðherra landsins og ræða leiðir til að styrkja enn betur tengsl Íslands við Eistland á alþjóðasviðinu. Vel fór á með ráðherrunum en á fundi þeirra voru öryggis- og varnarmál ofarlega á baugi, ástandið í Úkraínu og aukið samstarf norðurlanda og Eystrasaltsríkjanna. Þá mun hún einnig heimsækja færanlegt neyðarjúkrahús sem er verkefni sem er fjármagnað af íslenskum stjórnvöldum og unnið í samvinnu við eistneska aðila til stuðnings Úkraínu.

Á vettvangi sendiskrifstofanna var líka heilmargt um að vera. 

Fastanefnd Íslands í New York ásamt sendinefnd Íslands lauk ráðherravikunni með glæsibrag 

Jörundur Valtýsson fastafulltrúi Íslands hjá Sameinuðu þjóðunum var stoltur af framgöngu utanríkisráðherra og forsætisráðherra á ráðherravikunni en benti í leiðinni á þá leiðu staðreynd að fyrir hverja níu karlkyns leiðtoga sem tóku til máls í ráðherravikunni talaði einungis einn kvenkyns leiðtogi.

Þótt ráðherravikunni sé lokið er ekki slegið slöku við hjá fastanefndinni en nú fer nefndarstarf á fullt. 

Í sendiráði Íslands í Úganda var tekið vel á móti Paulinu Chiwangu, landsfulltrúa Úganda hjá UN Women, einnar helstu samstarfsstofnunar Íslands í þróunarsamvinnu á svæðinu. 

Evrópsk kvikmyndahátíð fer fram í Lilongwe í næstu viku. Á hátíðinni verða sýndar myndir frá Spáni, Ítalíu, Grikklandi, Noregi, Úkraínu, Rúmeníu, Írlandi, Finnlandi og Íslandi auk malavískra kvikmynda. Framlag Ísland er hin stórgóða Kona fer í stríð eftir Benedikt Erlingsson. 

Á alþjóðadegi öruggs þungunarrofs í gær sagði sendiráðsstarfsfólk í Lilongwe frá mikilvægu verkefni sem unnið er í Malawi með stuðningi íslenskra stjórnvalda og ekki síst sendiráðs Íslands á svæðinu.

Sendiráð Íslands í Berlín í samvinnu við ÚTÓN lagði íslenskum listamönnum lið á Reeperbahn tónlistahátíðinni sem fór fram á dögunum. 

Samgönguráðherrum EFTA ríkjanna var boðið á óformlegan samgönguráðherrafund í Barselóna. Kristján Andri Stefánsson, sendiherra Íslands í Brussel og Sigurbergur Björnsson sendiráðunautur innviðaráðuneytisins mættu fyrir hönd Sigurðar Inga Jóhannssonar innviðaráðherra sem átti ekki heimangengt og færðu fundinum skilaboð hans. 

Yfir til Kaupmannahafnar. Árni Þór Sigurðsson sendiherra afhenti Margréti Þórhildi Danadrottningu trúnaðarbréf sitt sem sendiherra í Danmörku. Athöfnin fór fram í Fredensborgar-kastala norður af Kaupmannahöfn. Við þetta tækifæri átti sendiherra fund með Drottningu þar sem þau ræddu m.a. söguleg og menningarleg tengsl landanna, náin bönd konungsfjölskyldunnar við íslensku forsetahjónin og fyrri forseta, norðurslóðamál og þá ekki síst loftslagsbreytingar, hopun jökla og bráðnun íshellunnar. Enn fremur bar á góma hið fjölmenna samfélag Íslendinga í Danmörku, lýðveldisafmælið á næsta ári, gagnkvæmar heimsóknir ráðamanna og margt fleira. Drottning óskaði að lokum sendiherra velfarnaðar í störfum sínum og góðrar dvalar í Danmörku. 

Nordic Fintech Week fór fram í Kaupmannahöfn í vikunni og skipulagði sendiráðið í samstarfi við Íslandsstofu og Fjártækniklasann þátttöku íslenskrar sendinefndar á hátíðinni. Af þessu tilefni bauð Árni Þór Sigurðsson sendiherra íslensku sendinefndinni ásamt dönskum samastarfsaðilum til móttöku í sendiráðinu síðastliðinn þriðjudag 

Aðalræðisskrifstofa Íslands í Nuuk tók þátt í vel heppnuðum vestnorrænum degi síðastliðinn sunnudag.

Sendiherra Íslands í Osló, Högni Kristjánsson, sótti danssýninguna "When the Bleeding Stops" eftir íslenska dansarann og danshöfundinn Lovísu Ósk Gunnarsdóttur en sýningin er einstaklega gott dæmi um norsk-íslenska samvinnu á sviði listar og menningar. 

Menningarlífið blómstrar sem aldrei fyrr í París, auðvitað með stuðningi sendiráðs Íslands í borginni. 

Fjölmargir íslenskir höfundar með stuðningi sendiráðs Íslands í Stokkhólmi og Íslandsstofu koma fram á Bókamessunni í Gautaborg sem fer fram þessa dagana. 

Sendiráð Íslands í Varsjá fékk sína fyrstu heimsókn frá þingmanni á dögunum þegar Andrés Ingi Jónsson kom þar við og fékk góðar móttökur.

Sendiráðið í Varsjá auglýsti einnig sýningu sem fer fram í SÍM Gallery í Reykjavík þar sem samvinnu íslenskra og pólskra listamanna er gert hátt undir höfði. 

Í Ottawa bauð Hlynur Guðjónsson sendiherra til jazz tónleika í sendiráðinu. Þar stigu á stokk Sigmar Matthíasson og John Kofi Dappaah og minntu í leiðinni á kjarnahlutverk bæði diplómasíunnar og listsköpunar sem er að auka skilning og byggja brýr. 

Fastanefnd Íslands hjá Evrópuráðinu í Strassborg stóð í gær studdi viðburð um Barnahús í tengslum við ráðherrafund menningarráðherra sem fór fram í borginni í vikunni. Ásmundur Einar Daðason mennta- og barnamálaráðherra sótti fundinn fyrir Íslands hönd.

Bergdís Ellertsdóttir sendiherra Íslands í Washington bauð fulltrúum Kennedy Center, Smithsonian og National Endowment for the Arts í heimsókn í sendiráðið ásamt góðum gesti frá menningar- og viðskiptamálaráðuneytinu. Á fundinum voru margar góðar hugmyndir að samstarfi Íslands og Bandaríkjanna á sviði lista og menningar ræddar. 

Þá hélt Davíð Logi Sigurðsson, sendifulltrúi Íslands í Washington, til Alaska þar sem hann tók þátt í fyrstu vinnustofu Ted Stevens Center for Arctic Security Studies fyrir varnarmálafulltrúa sendiráða frá norðurslóðum. 

Þórir Ibsen sendiherra Íslands í Peking hélt ávarp við gangsetningu nýrrar endurvinnslustöðvar Carbon Recycling International í Kína.

Og starfsfólk sendiráðsins brá sér á tónleika Laufeyjar í  Poly Theatre í Peking, við undirleik China Philharmonic Orchestra. Tónleikarnir voru vel sóttir og var íslensk-kínversku söngkonunni vel fagnað af áhorfendum.

Í gær var sem fyrr segir alþjóðadagur öruggs þungunarrofs og í tilefni dagsins stóðu evrópskir sendiherrar og málsvarar mannréttinda og kynjajafnréttis upp fyrir því sem ættu að vera sjálfsögð mannréttindi kvenna, yfirráðum þeirra yfir eigin líkama.  

Föstudagspósturinn verður ekki lengri að sinni. Látum silkimjúka rödd áðurnefndrar Laufeyjar bera okkur áfram inn í helgina.

Kær kveðja,
upplýsingadeild

Efnisorð

Föstudagspóstur

Hafa samband

Ábending / fyrirspurn
Ruslvörn
Vinsamlegast svaraðu í tölustöfum

Ef um er að ræða áríðandi erindi til borgaraþjónustu utanríkisráðuneytisins þá skal senda póst á [email protected]

Upplýsingar um netföng, símanúmer og staðsetningu ráðuneyta