Rúmlega þrjátíu þúsund Íslendingar styrktu SOS á síðasta ári

Alls 30.915 Íslendingar styrktu SOS Barnaþorpin á árinu 2020, fleiri en nokkru sinni fyrr. Þeim fjölgaði um 5.670 milli ára eða um 22,5 prósent. Heildartekjur til SOS Barnaþorpanna á Íslandi hækkuðu þó ekki nema um eitt prósent en þær námu um 674 milljónum króna. Þetta kemur fram í ársskýrslu og ársreikningi SOS á Íslandi sem samtökin hafa birt á vef sínum.

Af þessum 30.915 Íslendingum eru mánaðarlegir styrktaraðilar 10.434 og þeim fækkaði um 87 frá fyrra ári. Langflestir þeirra eru SOS foreldrar sem styrkja alls 8.704 börn í barnaþorpum í 107 löndum og fylgjast með uppvexti þeirra. Rekstrarkostnaður SOS á árinu 2020 var 18,7% sem þýðir að 813 krónur af hverju eitt þúsund króna framlagi renna að jafnaði í hjálparstarf SOS.

„Það sem helst skýrir að aukning tekna hafi ekki verið meiri en raun ber vitni er sú staðreynd að flestir nýir styrktaraðilar hafa valið að fara varlega í sakirnar og gefa stök framlög frekar en föst mánaðarleg framlög. Kannski sýnir þetta okkur að hegðun Íslendinga þegar kemur að framlögum til góðgerðarmála sé að breytast og að þeir vilji frekar gefa stöku sinnum og óreglulega heldur en skuldbinda sig til mánaðarlegra framlaga," segir Ragnar Schram, framkvæmdastjóri SOS í pistli sínum í ársskýrslunni.

Í skýrslunni segir að SOS Barnaþorpin séu fyrst og fremst barnahjálp sem veita munaðarlausum og yfirgefnum börnum staðgengil fyrir þá fjölskyldu sem þau hafa misst. SOS Children´s Villages eru stærstu óháðu hjálparsamtök heims sem einblína á börn án foreldraumsjár og jafnframt á ósjálfbjarga barnafjölskyldur.