Úthlutun framlaga úr Jöfnunarsjóði vegna NPA árið 2012

Eins og fram kemur í 4. gr. reglugerðar nr. 510/2012 um framlög Jöfnunarsjóðs sveitarfélaga vegna þjónustu við fatlað fólk á árinu 2012 greiðir Jöfnunarsjóður sveitarfélaga sveitarfélögum/þjónustusvæðum framlög vegna samninga þeirra við fatlað fólk um notendastýrða persónulega aðstoð (NPA).

Innanríkisráðherra tekur ákvörðun um úthlutun framlaga til NPA að fengnum tillögum ráðgjafarnefndar Jöfnunarsjóðs sveitarfélaga. Við tillögugerð ráðgjafarnefndar um úthlutun framlaganna skal taka mið af áætlun verkefnastjórnar NPA að fenginni umsögn samráðsnefndar um málefni fatlaðra.

Áætlað heildarfjármagn Jöfnunarsjóðs sveitarfélaga til ráðstöfunar í framlög vegna NPA á árinu 2012 er 140 m.kr. Hámarksframlag til sveitarfélaga/þjónustusvæða á árinu 2012 vegna NPA er jafnhátt og skiptihlutfall hvers svæðis vegna úthlutunar almennra framlaga vegna þjónustu við fatlað fólk á árinu 2012. Sveitarfélag/þjónustusvæði sem er með 1% af útreiknuðu heildarframlagi almennra framlaga vegna þjónustu við fatlað fólk fengi því að hámarki framlag að fjárhæð 1,4 m.kr. af ráðstöfunarfjármagni sjóðsins vegna framlaga til NPA (1% x 140 m.kr.). Hjálagt fylgir yfirlit yfir mögulegt hámarksframlag hvers þjónustusvæðis.

Verklag við umsókn og úthlutun framlaga vegna NPA:

1. Jöfnunarsjóður sveitarfélaga tilkynnti sveitarfélögum/þjónustusvæðum um mögulegt hámarksframlag vegna NPA á árinu 2012 á fundi með fulltrúum þjónustusvæða 6. júní sl.
2. Sveitarfélög/þjónustusvæði skulu skila umsóknum til Jöfnunarsjóðs sveitarfélaga um framlög á árinu 2012 vegna gerðra NPA samninga innan svæðisins á tímabilinu 1. júní til 15. október eigi síðar en 20. október nk. Óskað er eftir að ljósrit af gerðum samningum fylgi umsóknum sveitarfélagsins/þjónustusvæðisins.
3. Útreikningur framlaganna byggir á umsóknum sveitarfélaga/þjónustusvæða vegna gerðra NPA samninga á tímabilinu.
4. Útreikningur framlaganna tekur mið af því að greiðsla fyrir hvern NPA samning í umsókn sveitarfélags/þjónustusvæðis nemi að hámarki 20% af upphæð viðkomandi samnings. Framlag getur þó aldrei orðið hærra en sem nemur hámarksframlagi sveitarfélags/þjónustusvæðis miðað við skiptihlutfalli almennra framlaga vegna þjónustu við fatlað fólk á árinu 2012 eins og áður hefur komið fram.
5. Sveitarfélag/þjónustusvæði sem ekki ætlar að taka þátt í innleiðingu NPA afsalar sér tilkalli til úthlutunar framlags. Óskað er eftir að sú ákvörðun verði tilkynnt Jöfnunarsjóði.
6. Framlög til sveitarfélaga/þjónustusvæða vegna gerðra NPA samninga á tímabilinu 1. júní – 15. október skulu koma til greiðslu eigi síðar en um miðjan desember nk.
7. Verkefnisstjórn um NPA mun fá NPA samningana sem liggja til grundvallar umsókna sveitarfélaga/þjónustusvæða til umsagnar áður en ráðgjafarnefnd Jöfnunarsjóðs gerir endanlega tillögu til innanríkisráðherra um úthlutun framlaganna.
8. Verkefnisstjórn um NPA mun leggja mat á samningana með tilliti til þess hvort þeir falli undir viðmið verkefnisstjórnarinnar um að teljast NPA samningar.
9. Að lokinni yfirferð verkefnisstjórnarinnar mun ráðgjafarnefnd Jöfnunarsjóðs sveitarfélaga ljúka tillögugerð sinni til innaríkisráðherra um úthlutun framlaga til sveitarfélaga/þjónustusvæða á árinu 2012 að fenginni umsögn samráðsnefndar um málefni fatlaðra. Úthlutuð framlög vegna ársins 2012 munu koma til greiðslu eigi síðar en um miðjan desember eins og fram kemur í lið 5.
10. Verði afgangur af því fjármagni sem ætlað var til dreifingar á árinu 2012 vegna NPA verður honum bætt við það ráðstöfunarfjármagn sem áætlað er til NPA verkefnisins á árinu 2013.
11. Hvað árið 2013 varðar þá er gert ráð fyrir að sveitarfélög/þjónustusvæði sæki um að nýju vegna eldri samninga svo og vegna nýrra samninga sem gerðir hafa verið.

Vinnsla umsókna hefur verið tilkynnt til Persónuverndar.

• Reglugerð nr. 510/2012 um framlög Jöfnunarsjóðs sveitarfélaga vegna þjónustu við fatlað fólk á árinu 2012