Auknar endurbætur og viðhald fasteigna í samræmi við sérstakt fjárfestingarátak
Mynd/Stjórnarráðið Framkvæmdaverkefni Ríkiseigna sem lúta að endurbótum og viðhaldi fasteigna ríkisins aukast um 40%, eða 1,6 milljarða króna, frá því sem áætlað var, í samræmi við sérstakt fjárfestingarátak stjórnvalda til að vinna gegn samdrætti í hagkerfinu í kjölfar heimsfaraldurs kórónuveiru.
Samþykkt var í mars á þessu ári að ráðast í fjárfestingarátakið. Í kjölfarið settu Ríkiseignir, sem hafa umsjón með viðhaldi og endurbótum fasteigna, af stað verkefni sem ná m.a. til heilbrigðisstofnana, framhaldsskóla og lögreglu-og sýslumannsembætta víðsvegar um landið.
Meðal stærri viðbótarverkefna Ríkiseigna árið 2020 má nefna utanhússframkvæmdir á Hegningarhúsinu, endurnýjun klæðingar á Menntaskólanum við Laugarvatn og innanhússbreytingar á sjúkrahúsinu í Stykkishólmi.
Verkefni Ríkiseigna á grundvelli fjárfestingarátaksins eru vel á veg komin í samræmi við áherslur stjórnvalda um að styðja við eftirspurn og stuðla að aukinni framleiðni með því að ráðast í mikilvæga fjárfestingu í fasteignum ríkisins.