Greiðsluafkoma ríkissjóðs janúar-ágúst 2006

• Greiðsluafkoma ríkissjóðs janúar-ágúst 2006 (PDF 59K)

Greiðsluuppgjör ríkissjóðs eftir fyrstu átta mánuði ársins liggur nú fyrir. Samkvæmt uppgjörinu jókst handbært fé frá rekstri um 35,6 millj­arða króna innan ársins, sem er 19,3 milljörðum hagstæðari útkoma heldur en á sama tíma í fyrra. Tekjur reyndust um 27 millj­örðum hærri en í fyrra á meðan gjöldin hækkuðu um 6 milljarða. Hreinn lánsfjárjöfnuður er jákvæður um 33,2 milljarða króna, en hann var jákvæður um 27,6 milljarða á sama tíma í fyrra.

Sjóðstreymi ríkissjóðs janúar – ágúst 2002 til 2006

(Í milljónum króna)

Innheimtar tekjur ríkissjóðs námu 246 ma.kr. á fyrstu átta mánuðum ársins. Það er 27 ma.kr. eða 12,2% meira en á sama tíma í fyrra. Ef tekið er tillit til tilfærslu milli mánaða vegna tekjuskatts lögaðila nemur aukningin 10,7%. Skatttekjur og tryggingagjöld jukust um rúm 13% að nafnvirði. Á sama tíma hækkaði almennt verðlag um 6,4% og raunaukning skatttekna og tryggingargjalda var því 6½%. Aðrar tekjur minnkuðu um 21%, en það stafaði af því að arðgreiðslur frá Símanum voru ekki fyrir hendi í ár, þar eð hann er nú í einkaeigu, en í fyrra námu arðgreiðslur hans 6,3 ma. kr. meðan hann var einn í ríkiseigu.

Skattar á tekjur og hagnað námu 79 ma.kr. og jukust um 18 ma.kr. frá síðasta ári, eða 30%. Þar af jókst tekjuskattur einstaklinga um 12% og lögaðila um 70% (þá er leiðrétt fyrir fyrrgreindri tilfærslu) og fjár­magns­tekjuskattur um 45%. Innheimt tryggingagjöld jukust um 15% milli ára, eða 6% umfram hækkun launavísitölu á sama tíma. Inn­heimta eignarskatta nam 6,4 ma.kr. sem er þriðjungi minna en á sama tímabili í fyrra. Þar af námu stimpilgjöld 5 ma.kr. en innheimta þeirra á árinu hefur dregist saman um 20% frá fyrra ári, meðal annars vegna þess að dregið hefur úr skuldbreytingu lána.

Innheimta almennra veltuskatta nam 117 ma.kr. á fyrstu átta mán­uðum ársins og jókst um 10½% að nafnvirði frá fyrra ári eða 4% umfram hækkun vísitölu neysluverðs. Tekjur af virðisaukaskatti hafa aukist um 11% sem jafngildir tæplega 5% raunaukningu. Vegna laga­breytingar sem felur í sér rýmri greiðslufrest á virðisaukaskatti og aðflutnings­gjöldum fer marktækni samanburðar við fyrra ár eftir því hvaða tímabil innan ársins er til skoðunar en sé litið á hreyfanlegt meðaltal nokkurra mánuða kemur fram að verulega hefur hægt á raun­vexti tekna af sköttum sem lagðir eru á vöru og þjónustu. Aðrir skattar en virðisaukaskattur nema um þriðjungi af veltusköttum í heild og sé horft á þróun þess hluta veltuskattanna kemur einnig fram hjöðnun raunvaxtar á þessu ári sem hefur snúist í samdrátt um þessar mundir. Stærsti einstaki liður þessara skatta eru vörugjöld af öku­tækjum. Eftir mjög mikla aukningu þeirra á sl. ári hefur innheimta þeirra það sem af er þessu ári aðeins aukist um 3% umfram almennt verðlag.

Tekjur ríkissjóðs janúar–ágúst 2004 til 2006

Greidd gjöld nema 209,7 milljörðum króna og hækka um 5,9 milljaða milli ára, eða um 2,9%. Vaxtagreiðslur lækka hins vegar um 8,1 millj­arð, einkum vegna þess að stór flokkur spariskírteina var á inn­lausn í apríl í fyrra. Að vaxtagreiðslum undanskildum hækka gjöldin um 14 milljarða eða 7,5%. Mest munar um 4 milljarða hækkun til heil­brigðis­mála og 2,9 milljarða til menntamála. Þá hækka greiðslur til almanna­trygginga- og velferðarmála um 2,5 milljarða og til almennrar opin­berrar þjónustu um 1,9 milljarða. Greiðslur til löggæslu hækka um 1 milljarð, en greiðslur til atvinnumála hækka mun minna, eða um 0,5 milljarða milli ára. Heilbrigðismál og almannatryggingar vega sam­tals um helming af heildargreiðslum ríkisjóðs.

Gjöld ríkissjóðs janúar-ágúst 2004 til 2006

Lántökur ársins nema 25,2 milljörðum króna en afborganir lána 35,6 milljörðum. Mismunurinn er fjármagnaður með handbæru fé frá rekstri.

Eiginfjárframlag ríkisins í Nýsköpunarsjóð nam um 1 milljarð króna á árinu og 2,6 milljarðar voru greiddir til Lífeyrissjóðs starfs­manna ríkisins í því skyni að lækka framtíðarskuldbindingar ríkis­sjóðs.