Nr. 934/2024 Úrskurður
KÆRUNEFND ÚTLENDINGAMÁLA
Hinn 25. september 2024 er kveðinn upp svohljóðandi
úrskurður nr. 934/2024
í stjórnsýslumáli nr. KNU24040007
Kæra [...]
á ákvörðun
Útlendingastofnuna
r
I. Kröfur, kærufrestir og kæruheimild
Hinn 27. mars 2024 kærði [...], kt. [...], ríkisborgari Albaníu ( hér eftir kærandi), ákvörðun Útlendingastofnunar, dags. 12. mars 2024, um að synja umsókn hans um ótímabundið dvalarleyfi, sbr. e-lið 1. mgr. 58. gr. laga um útlendinga nr. 80/2016.
Af kæru má ráða að kærandi krefjist þess að ákvörðun Útlendingastofnunar verði felld úr gildi og að honum verði veitt ótímabundið dvalarleyfi.
Fyrrgreind ákvörðun er kærð á grundvelli 7. gr. laga um útlendinga og barst kæran fyrir lok kærufrests.
Lagagrundvöllur
Í máli þessu koma einkum til skoðunar ákvæði laga um útlendinga nr. 80/2016 ásamt síðari breytingum, reglugerð um útlendinga nr. 540/2017 ásamt síðari breytingum, ákvæði stjórnsýslulaga nr. 37/1993, stjórnarskrá lýðveldisins Íslands, sbr. lög nr. 33/1944, mannréttindasáttmáli Evrópu, sbr. lög nr. 62/1994, auk annarra alþjóðlegra skuldbindinga Íslands á sviði mannréttinda eftir því sem tilefni er til.
II. Málsatvik og málsmeðferð
Kærandi fékk fyrst útgefið dvalarleyfi hér á landi vegna skorts á starfsfólki, sbr. 62. gr. laga um útlendinga með gildistíma frá 4. október 2019 til 22. september 2020. Leyfið hefur verið endurnýjað nokkrum sinnum, síðast með gildistíma til 20. september 2024. Hinn 30. maí 2023 sótti kærandi um ótímabundið dvalarleyfi. Með ákvörðun Útlendingastofnunar, dags. 12. mars 2024, var kæranda synjað um ótímabundið dvalarleyfi, með vísan til þess að hann ætti ólokið mál í refsivörslukerfinu, þar sem hann væri grunaður eða sakaður um refsiverða háttsemi, sbr. e-lið 1. mgr. 58. gr. laga um útlendinga. Ákvörðun Útlendingastofnunar var móttekin af kæranda 14. mars 2024. Ákvörðunin var kærð til kærunefndar útlendingamála 27. mars 2024. Með tölvubréfi kærunefndar, dags. 2. apríl 2024, var kæranda veittur frestur til 16. apríl 2024, þess að leggja fram greinargerð vegna málsins. Með tölvubréfi, dags. 3. september 2024, óskaði kærunefnd eftir upplýsingum frá lögreglunni á höfuðborgarsvæðinu um það hvort kærandi ætti ólokið mál í refsivörslukerfinu. Í svari frá lögreglunni, dags. 12. september 2024, kom fram að kærandi ætti ólokið mál í refsivörslukerfinu. Kærandi var upplýstur um framangreint með tölvubréfi kærunefndar, dags. 12. september 2024, og veittur frestur til og með 16. september 2024, til þess að leggja fram andmæli, sbr. 12. gr. laga um útlendinga og 13. gr. stjórnsýslulaga. Kærandi brást ekki við tölvubréfum kærunefndar.
Í samræmi við 3. málsl. 6. mgr. 58. gr. laga um útlendinga er kæranda heimilt að dveljast hér á landi þar til ákvörðun hefur verið tekin um umsókn hans um ótímabundið dvalarleyfi, sbr. til hliðsjónar 2. málsl. 1. mgr. 103. gr. laga um útlendinga.
III. Málsástæður og rök kæranda
Kærandi lagði ekki fram sérstakar röksemdir vegna málsins.
IV. Niðurstaða kærunefndar útlendingamála
Í 58. gr. laga um útlendinga er fjallað um ótímabundið dvalarleyfi. Samkvæmt 1. mgr. 58. gr. er heimilt að veita útlendingi ótímabundið dvalarleyfi hafi hann dvalist hér á landi samfellt síðustu fjögur ár samkvæmt dvalarleyfi sem getur verið grundvöllur ótímabundins dvalarleyfis. Eins og að framan greinir hefur kærandi dvalið hér á landi samkvæmt dvalarleyfi sem getur verið grundvöllur ótímabundins dvalarleyfis frá 4. október 2019, sbr. 5. mgr. 62. gr. laga um útlendinga.
Frekari skilyrði fyrir útgáfu ótímabundins dvalarleyfis eru m.a. tilgreind í stafliðum a-e í 1. mgr. 58. gr. laga um útlendinga. Samkvæmt e-lið er það skilyrði að útlendingur eigi ekki ólokið mál í refsivörslukerfinu þar sem hann er grunaður eða sakaður um refsiverða háttsemi.
Samkvæmt upplýsingum frá lögreglunni á höfuðborgarsvæðinu, dags. 12. september 2024, á kærandi ólokið mál í refsivörslukerfinu. Kærandi uppfyllir því ekki ófrávíkjanlegt skilyrði fyrir veitingu ótímabundins dvalarleyfis og verður hin kærða ákvörðun Útlendingastofnunar því staðfest.
Úrskurðarorð:
Ákvörðun Útlendingastofnunar er staðfest.
The decision of the Directorate of Immigration is affirmed.
Valgerður María Sigurðardóttir
Gunnar Páll Baldvinsson Sandra Hlíf Ocares