Landspítali fær fjármagn til að útvista tilteknum aðgerðum og stytta þannig biðlista

Willum Þór Þórsson heilbrigðisráðherra hefur ákveðið að veita Landspítala 60 milljónir króna sem gerir spítalanum kleift að útvista vel á annað hundrað valdra aðgerða og stytta með því biðlista. Um er að ræða tiltölulega einfaldar aðgerðir sem ekki er líklegt að kalli á innlögn á sjúkrahús eða gjörgæsluþjónustu.

„Þetta er mikilvægt verkefni í þágu sjúklinga sem annars þurfa að bíða óhóflega lengi eftir aðgerð sem er íþyngjandi og slæmt fyrir heilsu fólks. Ég bind vonir við að hægt verði að ráðast í fleiri og stærri verkefni með þetta að markmiði á næstu mánuðum“ segir Willum Þór.

Ráðist var í sambærilegt átak fyrr í haust þegar heilbrigðisráðuneytið ráðstafaði 26 milljónum króna til Landspítala í þessu skyni, en þurft hefur að fresta fjölda aðgerða á Landspítala vegna Covid-19. Skurðlæknar spítalans framkvæmdu aðgerðirnar en Klíníkin í Ármúla útvegaði alla aðstöðu og sá um mönnun verkefnisins að öðru leyti.  Heilbrigðisráðuneytið óskaði í nóvember síðastliðnum eftir upplýsingum frá Landspítala um möguleika þess að ráðast í sambærilegt verkefni til að stytta biðlista eftir völdum aðgerðum. Niðurstaðan er sú að með fjárframlagi frá heilbrigðisráðuneytinu verður hægt að framkvæma vel á annað hundrað aðgerða á þessum forsendum. Aðgerðirnar sem stefnt er að því að útvista eru aðgerðir vegna þvagleka, brjóstaaðgerðir og kviðarholsskurðaðgerðir.