Barnamenning og menningaruppeldi

Mennta- og menningarmálaráðuneytið hefur staðið fyrir ráðstefnum um menningarmál undanfarin ár undir heitinu Menningarlandið og að þessu sinni var barnamenning og mikilvægi menningaruppeldis megin viðfangsefnið. Áhersla var lögð á menningu fyrir börn og menningu með börnum og þátttakendur voru listamenn, starfsmenn menningarstofnana og ýmsir aðrir sem sinna barnamenningarmálum. Aðalfyrirlesarar voru Tamsin Ace og Shân Maclennan frá menningarmiðstöðinni Southbank Centre í London. Ráðstefnan var haldin í samvinnu mennta- og menningarmálaráðuneytis, Byggðastofnunar, Sambands íslenskra sveitarfélaga og Eyþings. 

Fundargestir samþykktu ályktun þar sem meðal annars er þakkað fyrir framtak ráðuneytisins í þessum efnum og það hvatt til að „halda áfram á sömu braut, auka frekar fjármagn til málaflokksins og efla enn frekar tengslanet á milli aðila sem sinna barnamenningarstarfi á landinu öllu .“ Þá var hvatt til þess að farið verði að tillögu í Aðgerðaáætlun um menningu barna og ungmenna um að stofnaður verði faglegur samráðsvettvangur um menningarstarf fyrir - og með - börnum og ungmennum.