Greiðsluafkoma ríkissjóðs janúar-maí 2008

Greiðsluuppgjör ríkissjóðs fyrir fyrstu fimm mánuði ársins 2008 liggur nú fyrir.

Samkvæmt uppgjörinu er breyting á handbæru fé frá rekstri jákvæð um 29,9 milljarða króna innan ársins, sem er 2,7 milljörðum lakari útkoma heldur en á sama tíma í fyrra. Tekjur reyndust um 6,9 milljörðum hærri en í fyrra á meðan að gjöldin hækka um 13,1 milljarð króna. Hreinn lánsfjárjöfnuður er jákvæður um 27,5 milljarða króna, sem er 66,9 milljörðum hagstæðari útkoma en á sama tíma í fyrra.

Sjóðstreymi ríkissjóðs janúar - maí 2008

í milljónum króna

Innheimtar tekjur

Innheimtar tekjur ríkissjóðs á fyrstu fimm mánuðum ársins námu rúmlega 194 ma.kr. sem er 3,9% aukning frá sama tíma árið 2007. Þar af námu skatttekjur og tryggingagjöld 179 ma.kr. sem samsvarar um 12 ma.kr. aukningu á milli ára eða 6,9% að nafnvirði. Á sama tíma hefur almennt verðlag hækkað um 6,9% (VNV án húsnæðis) og skatttekjur og tryggingagjöld eru því óbreytt að raunvirði. Aðrar rekstrartekjur námu rúmlega 13 ma.kr. og jukust um 4,5% frá sama tímabili í fyrra en sá liður samanstendur að mestu af vaxtatekjum og tekjum af sölu vöru og þjónustu. Þá var eignasala ríkissjóðs um 2 ma.kr. á fyrstu fimm mánuðum ársins.
Skattar á tekjur og hagnað námu 74 ma.kr. sem er aukning um 11,4% frá sama tíma árið áður. Þar af nam tekjuskattur einstaklinga 38,5 ma.kr. og jókst um 4,9% að nafnvirði á milli ára. Tekjuskattur lögaðila nam 10 ma.kr. og jókst um 8% frá sama tíma árið áður. Skattur af fjármagnstekjum nam tæplega 26 ma.kr. og jókst um 24,3% að nafnvirði á milli ára en innheimta hans fer að langmestu leyti fram í janúar hvert ár. Innheimta eignarskatta nam um 3,5 ma.kr. sem er samdráttur upp á 21% á milli ára. Stimpilgjöld, sem eru um 80% eignarskattanna, drógust saman um 17,4% á tímabilinu.

Innheimta almennra veltuskatta nam tæplega 80 ma.kr. á fyrstu fimm mánuðum ársins og jókst um 3,9% að nafnvirði frá sama tíma árið áður en dróst hins vegar saman um 2,8% að raunvirði (miðað við hækkun vísitölu neysluverðs án húsnæðis). Þegar litið er á 6 mánaða hlaupandi meðaltal nemur raunlækkun veltuskatta 1,2%. Stærsti hluti veltuskattanna er virðisaukaskattur og skilaði hann ríkissjóði um 57 ma.kr. á tímabilinu sem er 3,2% aukning að nafnvirði frá fyrstu fimm mánuðum ársins 2007. Þar af skilaði hann tæpum 12 ma.kr. fyrir maímánuð sem er um 1,3 ma.kr. meira en reiknað var með í tekjuáætlun ársins. Virðisaukaskatturinn sem kemur inn í maí er af innflutningi í mánuðunum mars og apríl. Má leiða af því líkum að þessi háa upphæð endurspegli m.a. hærra innflutningsverð vegna gengisþróunar á árinu. Aðrir veltuskattar námu tæplega 23 ma.kr. frá janúar til maí, um 1 ma.kr. meira en í fyrra. Tekjur vegna tolla og aðflutningsgjalda námu 3 ma.kr. og jukust um 29% á milli ára. Þá var innheimta tryggingagjalda 17 ma.kr. sem er aukning um 4,9% frá sama tíma í fyrra.

Greidd gjöld

Greidd gjöld nema 159,1 milljarði króna og hækka um 6,9 milljarða króna frá fyrra ári, eða um 8,9%. Mest hækkun milli ára er á liðunum heilbrigðismál 3,2 milljarðar króna eða 8,4% og til almannatrygginga- og velferðarmála 3,1 milljarður króna eða 9,3%. Hlutfallslega er mest hækkun á liðnum varnarmál, en Ratsjárstofnun kemur inn sem ný stofnun undir þennan lið á þessu ári. Liðurinn Löggæsla, réttargæsla og öryggismál hækka um 17,2% eða 1,2 milljarða króna og vegur þar þyngst Landhelgissjóður vegna smíði varðskips með 850 milljóna króna hækkun á milli ára. Húsnæðis-, skipulags og veitumál hækka um 21,3% milli ára og munar þar mestu um auknar fjárveitingar vegna leiguíbúða.

Lánsfjárjöfnuður

Lánsfjárjöfnuður ríkissjóðs er jákvæður um 9,5 milljarða króna fyrstu fimm mánuði ársins, en lánsfjárþörfin var tæpir 73 milljarðar króna á sama tíma í fyrra. Hreinn lánsfjárjöfnuður nam 27,5 milljörðum króna janúar til maí, en var neikvæður um 39,4 milljarða króna fyrir sama tímabil á síðasta ári. Viðsnúningurinn skýrist að mestu leyti af 30,3 milljarða króna kaupum ríkissjóðs á hlut Reykjavíkurborgar og Akureyrarbæjar í Landsvirkjun og eiginfjáraukningu Seðlabanka Íslands með 44 milljarða króna eiginfjárframlagi á síðasta ári.

Tekjur ríkissjóðs janúar - maí 2006-2008

Gjöld ríkissjóðs janúar - maí 2006-2008