Undirrituðu viljayfirlýsingu um samstarf á sviði náttúruverndar, þjóðgarða og friðlýstra svæða

Guðlaugur Þór Þórðarson, umhverfis-, orku og loftslagsráðherra, og Carrin F. Patman, sendiherra Bandaríkjanna á Íslandi, hafa undirritað viljayfirlýsingu um samstarf ríkjanna á sviði náttúruverndar og reksturs í þjóðgörðum og öðrum friðlýstum svæðum. Patman undirritaði yfirlýsinguna fyrir hönd Þjóðgarðastofnunar Bandaríkjanna (e. U.S National Park Service) sem heyrir undir innanríkisráðuneyti landsins.

Á undanförnum árum hafa landverðir beggja vegna Atlantshafsins, auk annarra sem koma að starfsemi þjóðgarða og friðlýstra svæða kynnt sér hvernig þessi svæði eru rekin hjá þessum vinaþjóðum. Það hefur meðal annars falið í sér fræðsluheimsóknir, námskeið fyrir landverði og fræðslukynningar á netinu.  

Þjóðirnar hafa nú ákveðið að skrifa undir viljayfirlýsingu sem festir í sessi áframhaldandi samstarf ríkjanna í málaflokknum.

Í yfirlýsingunni kemur m.a. fram að í samstarfinu felist að landverðir á Íslandi geti sótt fræðslu í bandaríska þjóðgarða og bandarískir landverðir sömuleiðis í þá íslensku, námskeið verði haldin af sérfræðingum U.S. National Park Service fyrir landverði og annað starfsfólk friðlýstra svæða á Íslandi, námsheimsóknir til stofnana sem reka þjóðgarðana og/eða í þjóðgarðana sjálfa, og vefnámskeið eða vef-fundir þar sem farið er yfir málefni sem tengjast þjóðgörðum og örðum friðlýstum svæðum.

Guðlaugur Þór Þórðarson, umhverfis-, orku og loftslagsráðherra: „Það er mikilvægt að undirrita þessa viljayfirlýsingu þar sem hún felur í sér mikil tækifæri til aukins samstarfs Íslands og  Bandaríkjanna á sviði náttúruverndar. Hugtakið þjóðgarður verður til í Bandaríkjunum á seinni hluta 19. aldar þegar menn átta sig á mikilvægi þess að náttúruperlur þjóðarinnar yrðu áfram til staðar fyrir framtíðarkynslóðir. Við getum því lært mikið af þeim varðandi rekstur slíkra svæða, en ekki síður lagt ýmislegt til málanna þar sem þjóðgarðarnir okkar og önnur friðlýst svæði eru meðal mest sóttu ferðamannastaða landsins.“