Afhending trúnaðarbréfs í Austurríki
![Stefán Skjaldarson afhendir forseta Austurríkis, Dr. Heinz Fischer, trúnaðarbréf sitt sem sendiherra Íslands í Austurríki.](/media/utanrikisraduneyti-media/media/Frettamyndir/Afhending_i_Vin.jpg?proc=singleNewsItem)
Stefán Skjaldarson afhenti hinn 14. október 2009 forseta Austurríkis, Dr. Heinz Fischer, trúnaðarbréf sitt sem sendiherra Íslands í Austurríki. Athöfnin fór fram í Hofburg sem var áður keisarahöllin í Vín. Umræðuefni á fundinum voru m.a. tvíhliða samskipti Íslands og Austurríkis, aðildarumsókn Íslands að Evrópusambandinu og alþjóðamál.
Tvíhliða samskipti Íslands og Austurríkis eru vinsamleg og í góðum farvegi og var það staðfest í samtölum við forsetann. Fremur lítil skráð vöruviðskipti eru milli Íslands og Austurríkis en margir austurrískir ferðamenn leggja leið sína til Íslands, sem og íslenskir ferðamenn til Austurríkis. Þá eru samskiptin á menningarsviðinu blómleg og hafa margir íslenskir listamenn hlotið menntun sína í Austurríki.
Á vettvangi alþjóðamála á samstarf sér einkum stað á vettvangi Evrópska efnahagssvæðisins, sem og í alþjóðastofnunum á borð Öryggis- og samvinnustofnun Evrópu, ÖSE, og Sameinuðu þjóðunum.
Austurríki gegnir afar mikilvægu hlutverki á alþjóðavettvangi og eru höfuðstöðvar margra alþjóðastofnana staðsettar í Vín, s.s. ÖSE, Sameinuðu þjóðirnar, Alþjóðakjarnorkumálastofnunin, undirbúningsnefnd samningsins um allsherjarbann við tilraunum með kjarnavopn (CTBTO), o.fl.
Sendiráð Íslands í Vín fer einnig með fyrirsvar gagnvart mörgum nágrannaríkjum í Mið-Evrópu og á Balkanskaga, en Austurríki á langa samskiptasögu við þessi ríki og er einnig viðskipta- og samskiptamiðstöð við þau.