Fjöldamörk afnumin vegna ívilnana fyrir raf- og vetnisbíla á næsta ári
Golli Í lögum um virðisaukaskatt er nú kveðið á um sérstaka VSK-ívilnun vegna innflutnings og skattskyldrar sölu rafmagnsbíla út árið 2023 eða þar til 20.000 bíla fjöldamörkum er náð en gert er ráð fyrir að gildandi fjöldamörkum gæti verið náð nálægt miðju ári 2023. Tillaga frumvarpsins um niðurfellingu á fjöldamörkum rafmagns- og vetnisbíla er m.a. gerð til að tryggja aukinn fyrirsjáanleika og með vísan til stöðuskýrslu aðgerðaáætlunar í loftslagsmálum frá júlí sl.
Mikill árangur í orkuskiptum með tugmilljarða ívilnunum
Undanfarin tíu ár hafa stjórnvöld stutt við kaup á vistvænum bílum með skattaívilnunum fyrir á þriðja tug milljarða króna. Fyrir vikið hafa orkuskipti fólksbílaflotans gengið vel og er Ísland á meðal fremstu þjóða á heimsvísu í rafbílavæðingu. Vistvænum bílum hefur þannig fjölgað verulega undanfarin ár, en hlutdeild þeirra í nýskráningum jókst úr 22% árið 2019 í 46% árið 2020 og á árinu 2021 fór hlutfallið upp í 58%. Þegar litið er til fyrstu tíu mánaða þessa árs má sjá að hlutfall nýskráninga er komið upp í 55%. Í ljósi þessarar jákvæðu þróunar á markaði með rafmagnsbíla verður ekki annað séð en að forsendur séu að skapast fyrir sjálfbærum hraða orkuskiptanna.Fyrr á árinu samþykkti Alþingi lög um breytingu á lögum um virðisaukaskatt sem m.a. fela í sér að ný fjárhæðarmörk VSK-ívilnunar vegna rafmagns- og vetnisbíla taki gildi 1. janúar 2023. Með breytingunni fer fjárhæð ívilnunar úr 1.560 þús. kr. í 1.320 þús. kr. Við breytingarnar var horft til þess að í 74% tilvika á árinu 2021 nam full niðurfelling virðisaukaskatts við innflutning rafmagnsbifreiða lægri fjárhæð en 1.320 þús. kr. Má því ætla að virðisaukaskattur verði áfram felldur niður að fullu vegna mikils meirihluta bíla.
Stutt við grósku í rannsóknum og þróun
Þá hafa bráðabirgðaákvæði laga um stuðning við nýsköpunarfyrirtæki jafnframt verið framlengd um tvö ár með þeim hætti að þau ná til frádráttar frá álögðum tekjuskatti nýsköpunarfyrirtækja árin 2024 og 2025 vegna rekstraráranna 2023 og 2024. Þar með eiga nýsköpunarfyrirtæki, sem eru eigendur að rannsóknar- eða þróunarverkefnum sem hlotið hafa staðfestingu Rannís, rétt á frádrætti frá álögðum tekjuskatti sem nemur allt að 35 hundraðshlutum af útlögðum kostnaði að nánari skilyrðum uppfylltum. Þá var hámark kostnaðar til útreiknings á frádrætti hjá hverju fyrirtæki jafnframt hækkað úr samtals 1 milljarði kr. í samtals 1,1 milljarð kr. á árunum 2024 og 2025.
Ísland hefur mælst í 17. sæti af 132 þjóðum hvað varðar nýsköpunarvirkni (WIPO global innovation index) og hefur hækkað úr 23. sæti á fjórum árum. Útflutningstekjur hugverkaiðnaðar hafa þannig verið áætlaðar um 10% af útflutningi Íslands, en þær hafa tvöfaldast frá árinu 2014 og aukist um 50% frá 2018. Greinin samanstendur af fjölbreyttum fyrirtækjum sem selja ólíka þjónustu erlendis, en sérleyfi í lyfjaiðnaði hafa gjarnan verið fyrirferðarmikil.