Hoppa yfir valmynd

Haus fyrir smærri skjái

Merki Stjórnarráðs Íslands Stjórnarráð Íslands
17. mars 2023 Utanríkisráðuneytið

Föstudagspóstur 17. mars 2023

Föstudagur er runninn upp. 

Upplýsingadeildin heilsar ykkur úr frostinu í Reykjavík. Vikan er á enda og nú sem endranær hafa heilmargir viðburðir átt sér stað í utanríkisþjónustunni bæði heima og á sendiskrifstofum okkar víða um heim. 

Byrjum á fréttum af ráðherra. Þórdís Kolbrún Reykfjörð Gylfadóttir utanríkisráðherra fór til Úkraínu í vikunni ásamt Katrínu Jakobsdóttur forsætisráðherra og fylgdarliði. Tilefnið var að heimsækja Volodimír Selenskí Úkraínuforseta sem tók á móti þeim á forsetaskrifstofu sinni í Kænugarði en ástæða fundarins var að sýna Úkraínsku þjóðinni samstöðu sem formennskuríki í Evrópuráðinu. Á fundinum var meðal annars rætt um leiðtogafundinn sem fram fer í Reykjavík í maí, þar sem málefni Úkraínu verða í brennidepli, og mögulega þátttöku Selenskís á fundinum, hvort sem hún fer fram í eigin persónu eða í gegnum fjarfundabúnað. 

Í ferðinni hitti ráðherra einnig utanríkisráðherra Úkraínu og í lok þess fundar var gefin út sameiginleg yfirlýsing um ábyrgðarskyldu gagnvart Úkraínu vegna árásar Rússlands.

Í ferðinni heimsóttu þær einnig bæði Bucha og Borodianka og fengu þar tækifæri til að sjá með eigin augum afleiðingar og ummerki um þann kalda veruleika sem árásarstríð Rússlands býður úkraínsku þjóðinni að lifa við.

Náið var fylgst með ferðinni af íslenskum fjölmiðlum og vandlega greint frá henni á fréttavakt Ríkisútvarpsins. 

Í gær var ár liðið frá því að ráðherranefnd Evrópuráðsins samþykkti að vísa Rússlandi úr ráðinu. Af því tilefni sendi Þórdís Kolbrún Reykfjörð Gylfadóttir ráðherra sem núverandi forseti ráðherranefndar Evrópuráðsins frá sér yfirlýsingu. 

Og þá beinum við sjónum okkar að sendiskrifstofunum. Við hefjum leika í Norður-Ameríku. 

Á fimmtudagsmorgun hélt sendiráðið í Ottawa vefnámskeið fyrir íslensk fyrirtæki: Doing Business in Canada. Námskeiðið, sem var vel sótt, veitti þátttakendum innsýn í markaðinn og þau tækifæri sem eru í boði fyrir íslensk fyrirtæki í Kanada. Það var haldið í samstarfi við sendiráð Kanada í Reykjavík, með stuðningi frá Íslandsstofu.

Dagana 12.-14. mars sótti Hlynur Guðjónsson, sendiherra Íslands í Kanada, Seafood Expo North America (SENA) í Boston. SENA er stærsta sjávarútvegssýningin í Norður Ameríku og sýningin í ár var ein sú stærsta frá upphafi. Hann átti m.a. fundi með sjávarútvegsráðherrum Nova Scotia, Newfoundland-Labrador og New Brunswick þar sem rætt var um mögulega sendinefnd Atlantic Canada-fylkjanna til Íslands. Yfir 25 íslensk fyrirtæki voru einnig á sýningunni og Íslandsstofa var með sérstaka þjóðarbása á svæðinu. 

Bergdís Ellertsdóttir sendiherra Íslands í Washington átti fund með þingmanninum Greg Murphy frá Norður-Karólínu um mögulegt samstarf, sjávarútvegs- og umhverfismál auk flugmála.

Sendiherra tók einnig þátt í málstofu um stafrænt ofbeldi gegn konum og stúlkum og greindi frá aðgerðum íslenskra stjórnvalda til að tækla þennan vaxandi vanda.

Samráð og samstarf um orkumál og grænar lausnir er vaxandi milli Íslands og Bandaríkjanna. Sendiráðið í Washington fundaði með yfirmanni í orkumálaráðuneyti, Brad Crabtree, og sérfræðingum um orkumál, möguleg samstarfsverkefni og vettvangsheimsókn til Íslands.

Í New York tóku norrænu fastanefndinar sig saman og kölluðu eftir því að mannréttindi íbúa Myanmar væru virt. 

Og Anna Pála Sverrisdóttir, sendiráðunautur hjá Fastanefnd Íslands í New York tók þátt í námskeiði um alþjóðalög um mannréttindi, sem haldið var af New York University og Rauða Krossinum í New York. 

Aðalræðismaður okkar í New York Nikulás Hannigan  sótti einnig sjávarútvegssýninguna SENA, enda er um stærstu sjávarútvegssýningu í Norður Ameríku að ræða og þátttaka íslenskra fyrirtækja áberandi. 

Og þá ferðumst við alla leið til Asíu og svo til Afríku

Í Peking sótti Þórir Ibsen sendiherra sýningu Peking óperunnar í boði aðstoðar utanríkisráðherra Kína. 

Sendiráðið studdi einnig þátttöku íslenskra fyrirtækja á kaupstefnu í Harbin. 

auk þess sem staðgengill sendiherra sótti heim endurhæfingarmiðstöðina í Harbin sem um árabil hefur notið góðs af þjónustu Össurar. 

Stefán Haukur Jóhannesson sendiherra í Tókýó tók á móti ungum og áhugasömum ferðalangi sem heimsækir bráðum Ísland og vildi vita allt um eldgosið í Heimey. 

Í Malawi urðu miklar náttúruhamfarir, flóð og aurskriður, af völdum hitabeltisstormsins Freddy og vottaði sendiráðið landsmönnum samúð sína og lýsti yfir stuðningi á samfélagmiðlum. 

Auk þess var ákveðið af íslenskum stjórnvödum að verja 71 milljón íslenskra króna í neyðarframlag til Matvælaáætlunar Sameinuðu þjóðanna á svæðinu vegna þess neyðarástands sem skapaðist í kjölfar óveðursins. Sagt var frá því á vef stjórnarráðsins. 

Og þá yfir til Evrópu.

Í Varsjá var tekið á móti Katrínu Jakobsdsóttur forsætisráðherra og Þórdísi Kolbrúnu Reykfjörð Gylfadóttur utanríkisráðherra þar sem þær áttu fund með forsætisráðherra Póllandse, Matusz Moraviecki. Á fundinum voru tvíhliða tengsl landanna rædd en einnig hitamál í Evrópu, svo sem stríðið í Úkraínu. Heimsóknin var liður í ferðalagi ráðherranna tveggja til Úkraínu sem greint var frá í upphafi pósts. 

Einar Gunnarsson sendiherra og fastafulltrúi Íslands hjá alþjóðastofnunum í Genf flutti ræðu fyrir hönd Norðurlanda og Eystrasaltsríkjanna um ofbeldi gegn börnum.

Unnur Orradóttir Ramette sendiherra Íslands í París tók þátt í netverki kvenna ásamt 6 öðrum kvensendiherrum á svæðinu.

Í Strassborg tók Oddný Mjöll Arnardóttir formlega við embætti dómara við Mannréttindastól Evrópu.

Í Vínarborg fór fram 66. þing fíkniefnanefndar Sameinuðu þjóðanna þar sem Ísland átti þátt í nokkrum hliðarviðburðum.

Ljósmyndasýning Ragnars Axelssonar var opnuð í Hamborg á fimmtudagskvöld og ávarpaði sendiherra Íslands í Berlín María Erla Marelsdóttir gesti sýningarinnar. Á sýningunni er farið yfir langan og glæstan feril Ragnars sem spannar um það bil 40 ár, en svarthvítar myndir hans eru þekktar fyrir það að sýna í návígi líf og náttúru á norðurslóðum.

 

Sendiráð Íslands í Brussel efndi til menningarleiks á Facebook þar sem tveir heppnir "hlustendur" gátu unnið miða á hina margrómuðu kvikmynd Hlyns Pálmasonar Volaða land. 

 

Fjöllum að endingu um lífið hjá sendiskrifstofum okkar á Norðurlöndunum og í Moskvu. Byrjum þar.

Árni Þór Sigurðsson sendiherra átti fund með varautanríkisráðherra Kirgistan, Almaz Imangaziev, í höfuðborginni Bishkek.  

Þá fór fram formleg opnun kjörræðisskrifstofu í borginni þann 16. mars við hátíðalega athöfn en kjörræðismaður fyrir Ísland í Kirgistan var í fyrsta skipti skipaður í nóvember síðastliðnum.

Harald Aspelund sendiherra í Helsinki kynnti formennskuáætlun Íslands í Norrænu ráðherranefndinni fyrir kollegum. 

Og sendiráð Íslands í Finnlandi tók einnig á móti fulltrúum frá menntasviði Kópavogsbæjar sem voru í heimsókn í landinu til að skoða áherslur annars bæjarfélags á barnvænt samfélag. 

Sendiherra Íslands í Stokkhólmi Bryndís Kjartansdóttir er um þessar mundir í heimsókn í Kýpur. 

Í Kaupmannahöfn lauk kvikmyndahátíðinni North Atlantic Film Days sem sendiráðið léði lið sitt. Starfsmenn sendiráðsins geta ekki beðið eftir þeirri næstu. 

Við ljúkum föstudagspóstinum að þessu sinni í hjá aðalræðisskrifstofunni í Þórshöfn í Færeyjum sem minnir okkur á að þótt frostið bíti okkur stundum í kinnarnar getur það líka myndað fegurð sem gott er að staldra við og taka eftir.

Efnisorð

Föstudagspóstur

Hafa samband

Ábending / fyrirspurn
Ruslvörn
Vinsamlegast svaraðu í tölustöfum

Ef um er að ræða áríðandi erindi til borgaraþjónustu utanríkisráðuneytisins þá skal senda póst á [email protected]

Upplýsingar um netföng, símanúmer og staðsetningu ráðuneyta