Norrænir ráðherrar samþykkja yfirlýsingu um sjálfbærni í mannvirkjamálum
Norrænir ráðherrar húsnæðis- og mannvirkjamála komu saman á fundi í Reykjavík í vikunni. Sigurður Ingi Jóhannsson, innviðaráðherra, var gestgjafi og stýrði fundinum sem haldinn er árlega undir merkjum Norrænu ráðherranefndarinnar. Ísland fer með formennsku í Norrænu ráðherranefndinni í ár en nefndin er opinber samstarfsvettvangur norrænu ríkisstjórnanna.
Á ráðherrafundinum var tímamótayfirlýsing um sjálfbærni í mannvirkjamálum samþykkt einróma. Í yfirlýsingunni segir að berjast þurfi gegn loftslagsbreytingum með skýrum aðgerðum á sviði mannvirkjamála og markmiðið sé að Norðurlöndin verði leiðandi í vistvænni mannvirkjagerð í heiminum. Unnið hefur verið að mótun yfirlýsingarinnar frá árinu 2021 þegar Norræna ráðherranefndin hleypti af stokkunum samvinnuverkefninu Nordic Sustainable Construction.
Sigurður Ingi sagði frá mikilvægum skrefum sem stigin hafi verið á Íslandi. Hann sagði frá samstarfsverkefninu Byggjum grænni framtíð, þar sem stjórnvöld og hagaðilar byggingariðnaðarins hafa sett fram vegvísi um vistvæna mannvirkjagerð með aðgerðaáætlunum.
Áskoranir á sviði húsnæðismála
Á fundinum var fjallað vítt og breitt um húsnæðis- og mannvirkjamál og áherslur í hverju landi. Skýrt kom fram að Norðurlöndin öll glíma við áskoranir á sviði húsnæðismála, ekki síst vegna framboðs á húsnæði. Víða er því unnið að því að einfalda og gera stjórnsýsluna skilvirkari til að liðka fyrir uppbyggingu á húsnæðismarkaði.
Áhersla á að auka samanburðarhæfni á loftslagsáhrifum bygginga á Norðurlöndunum
Norræna verkefnið, Nordic Sustainable Construction, rennur inn í nýtt norrænt samstarfsverkefni sem miðar að því að auka samanburðarhæfni og samhæfni tæknilegra útreikninga á lífsferilsmati og viðmiðunarmörkum fyrir loftslagsáhrif bygginga á Norðurlöndunum.