Styrkir veittir til rannsókna á stofnum villtra fugla og spendýra 

Umhverfisráðherra veitti nýverið styrki úr veiðikortasjóði að upphæð 31.006.700 kr. til rannsókna á stofnum villtra fugla og villtra spendýra. Úthlutunin er byggð á 11. gr. laga nr. 64/1994 um vernd, friðun og veiðar á villtum fuglum og villtum spendýrum. Þar segir að umhverfisráðherra úthluti fé til rannsókna af tekjum af sölu veiðikorta. Ráðuneytið auglýsti eftir umsóknum um styrki úr veiðikortasjóði í desember á síðastliðnu ári og úthlutaði í kjölfarið styrkjum að fenginni umsögn Umhverfisstofnunar.

Meðfylgjandi er listi yfir umsækjendur og veitta styrki: 

• Erpur Snær Hansen, Náttúrustofu Suðurlands. Myndarvélarlinsa og minni seining til rannsókna á stofnbreytingum bjargfugla Vestmannaeyja. 0 kr.
• Erpur Snær Hansen, Náttúrustofu Suðurlands. Holumyndavél til rannsókna á ábúðarhlutfalli og varpárgangi lunda. 1.017.100 kr.
• Erpur Snær Hansen, Náttúrustofu Suðurlands. Mælingar stofnstærðar lundastofns Íslands. 1.426.000 kr.
• Kristinn H. Skarphéðinsson, Náttúrufræðistofnun Íslands. Mat á stofnstærð heiðagæsavarps í Þjórsárverum og Guðlaugstungum. 4.800.000 kr.
• Halldór Walter Stefánsson. Aldursgreining gæsa í sárum. 1.407.000 kr.
• Halldór Walter Stefánsson. Áhrif eggjatöku á afkomu heiðagæsa og grágæsa á Íslandi. 0 kr.
• Tómas G. Gunnarsson og Jón E. Jónsson, Háskólasetri Suðurlands. Breytileiki í gæðum varpbúsvæða grágæsa: Gildi fyrir nýtingu og verndun. 1.000.000 kr.
• Arnþór Þ. Sigfússon, Verkís. Vöktun á ungahlutfalli í veiðistofnum gæsa og anda með aldursgreiningu vængja úr veiði og vöktun á ungahlutfalli í friðuðum stofni blesgæsa. 2.056.000 kr.
• Náttúrufræðistofnun Íslands. Rjúpnarannsóknir ársins 2009. 6.500.000 kr.
• Náttúrufræðistofnun Íslands. Rjúpnarannsóknir ársins 2010. 9.500.000 kr.
• Snorri H. Jóhannesson. Gerð kennslumyndbands um minkaveiðar. 500.000 kr.
• Umhverfisstofnun. Refarannsóknir PH. 2.800.000 kr.