Fyrsta heildarlöggjöf um tónlist samþykkt á Alþingi

Alþingi samþykkti frumvarp menningar- og viðskiptaráðherra um fyrstu heildarlöggjöfina um tónlist á Íslandi.

Löggjöfin er byggð á nýrri tónlistarstefnu til ársins 2030 og hefur það að markmiði að efla umgjörð fyrir sköpun og flutning tónlistar á Íslandi, marka heildarramma fyrir málefni tónlistar og búa henni hagstæð skilyrði.

„Þetta eru sannkölluð tímamót fyrir tónlist hér á landi. Ég óska öllu okkar frábæra tónlistarfólki til hamingju og hlakka svo sannarlega til að hlusta á afrakstur þessara mikilvægu breytinga. Einnig vil ég þakka öllu því frábæra fólki sem vann að stefnumótuninni,“ segir Lilja Dögg Alfreðsdóttir menningar- og viðskiptaráðherra.

Ný tónlistarmiðstöð

Með lögunum hyllir undir nýja Tónlistarmiðstöð sem stofnuð verður í ár og er ætlað að sinna uppbyggingu og stuðningi við hvers konar tónlistarstarfsemi og útflutningsverkefni allra tónlistargreina. Þar að auki mun miðstöðin sinna skráningu, umsýslu og miðlun íslenskra tónverka. Með stofnun Tónlistarmiðstöðvar er stigið stórt skref í áttina að því að veita listgreininni aukið vægi og til að greiða leið íslensks tónlistarfólks, innan lands sem utan.

Tónlistarmiðstöð er sjálfseignarstofnun sem rekin er á einkaréttarlegum grunni með sjálfstæðri fjárhagsábyrgð og starfar samkvæmt sérstakri skipulagsskrá sem stjórn setur og staðfestir.

Nýr og stærri tónlistarsjóður

Nýr tónlistarsjóður verður einnig settur á laggirnar á grundvelli laganna en hann verður til með sameiningu núverandi Tónlistarsjóðs, Hljóðritasjóðs og Útflutningssjóðs íslenskrar tónlistar. Hlutverk hins nýja sjóðs verður að efla íslenska tónlist, hljóðritagerð og þróunarstarf í íslenskum tónlistariðnaði.

Sjóðurinn skal stuðla að kynningu á íslenskum tónlistarmönnum og tónsköpun þeirra, hér á landi sem erlendis. Tónlistarsjóður mun skiptast í fjórar deildir, þróun og innviði, frumsköpun og útgáfu, lifandi flutning og útflutning.

„Ég fagna því að nýr og stærri Tónlistarsjóður verður einnig að veruleika. Mun hann sameina þrjá sjóði sem fyrir eru á sviði tónlistar. Lykilhlutverk hans verður að efla íslenska tónlist, hljóðritagerð og þróunarstarf í tónlistariðnaði. Með tilkomu sjóðsins verður styrkjaumhverfi tónlistar einfaldað til muna og skilvirkni og slagkraftur aukinn verulega,“ segir menningar- og viðskiptaráðherra.

Tónlistarráð sett á laggirnar

Í lögunum er sömuleiðis að finna ákvæði um sérstakt tónlistarráð sem verður stjórnvöldum og tónlistarmiðstöð til ráðgjafar um málefni tónlistar. Tónlistarráði er ætlað að vera öflugur samráðsvettvangur milli stjórnvalda, Tónlistarmiðstöðvar og tónlistargeirans enda felst í því mikill styrkur að ólík og fjölbreytt sjónarmið komi fram við alla stefnumótunarvinnu á sviði tónlistar.

Nýja löggjöfin er í samræmi við stjórnarsáttmála ríkisstjórnarinnar þar sem fram kemur að umhverfi tónlistargeirans á Íslands verði endurskoðað og að áfram skuli tryggja undirstöður íslensks menningar- og listalífs og skapa ný tækifæri fyrir íslenska listamenn.

„Ég er þakklát fyrir þann mikla stuðning sem málið hlaut á Alþingi Íslendinga. Ég vil sömuleiðis þakka þeim góða og öfluga hópi fólks sem hefur tekið þátt í þessari vinnu. Framtíð íslenskrar tónlistar er orðinn enn bjartari í kjölfar þessara breytinga sem verður gaman að fylgjast með fram á vegin,“ segir Lilja Alfreðsdóttir menningar- og viðskiptaráðherra.