Vinna hafin við mótun opinberrar stefnu í sviðslistum

Vinna er hafin við opinbera stefnu í sviðslistum á vegum menningar- og viðskiptaráðuneytisins. Opinber stefna í sviðslistum hefur ekki verið unnin áður sem heildrænt fyrirbæri.

Lilja Alfreðsdóttir menningar- og viðskiptaráðherra hefur ráðið Orra Huginn Ágústsson forseta Sviðslistasambandsins Íslands til að stýra þeirri vinnu.

„Til að skapa heildstæða og góða stefnu er nauðsynlegt að ná öllum fag- og hagaðilum að borðinu svo að fólk finni að það hafi rödd í ferlinu,“ segir Lilja Alfreðsdóttir menningar- og viðskiptaráðherra.

Markmiðið er því að vinna að góðu samtali fagfólks í sviðslistum. Verkefnið er þegar hafið en Orri Huginn er byrjaður á því að kortleggja landslag og hagkerfi sviðslista m.t.t. framtíðarmöguleika geirans. Verkefninu er skipt í nokkra áfanga. Markmiðið er meðal annars að skapa skýra framtíðarsýn og móta stefnu hins opinbera í sviðslistum til lengri og skemmri tíma. Einnig að meta stöðu og möguleika sviðslistafólks og stofnana í sviðslistum.

„Ný lög um sviðslistir tóku gildi 1. júlí árið 2020. Tilkoma þeirra var heillaskref þar sem lögin eru til þess fallin að efla íslenskt menningarlíf og stuðla að aukinni fagmennsku. Það er mikil gróska í umhverfi sviðslista og framtíðin er björt,“ segir menningar- og viðskiptaráðherra.

Ný miðstöð fyrir sviðslistir, Sviðslistamiðstöð Íslands, tók formlega til starfa árið 2022 en listafólk sem starfar innan sviðslista hafði lengi kallað eftir slíkri miðstöð. Sviðslistamiðstöð Íslands gegnir því hlutverki að styðja íslenskar sviðslistir og auka sýnileika þeirra og hróður innan lands sem utan. Hún vinnur að því hörðum höndum af því að skapa ný sóknarfæri fyrir sviðslistafólk.