Veruleg lækkun tekjuskatts

Tekjuskattur lækkar verulega með nýsamþykktum lögum Alþingis um tekjuskatt og staðgreiðslu opinberra gjalda. Lækkunin verður í tveimur áföngum, 1. janúar 2020 og 1. janúar 2021.

Ábatinn skilar sér til allra tekjutíunda og mest til þeirra tekjulægstu, en tekjuskattur þess hóps lækkar um rúmlega 120 þúsund krónur á ári. Þegar lækkunin er að fullu komin fram munu ráðstöfunartekjur heimilanna aukast um 21 ma.kr. á ári. Er þetta mikilvægur liður í því að styðja við heimilin þegar hægir á í atvinnulífinu og er lækkun tekjuskatts einn grundvöllur lífskjarasamninganna, sem gerðir voru fyrr á árinu.

Strax á næsta ári munu skattgreiðslur fólks við fyrstu þrepamörkin lækka um 42 þúsund krónur. Þá hefur verið tekið tillit til lækkunar persónuafsláttar sem beitt er í samspili við upptöku nýs lægsta þreps, til að beina þunga lækkunarinnar til þeirra sem eru um eða undir meðaltekjum.

Auk lækkunar tekjuskatts kemur til framkvæmdar seinni hluti 0,5 prósentustiga lækkunar tryggingagjalds, en gjaldið var lækkað um 0,25 prósentustig í upphafi árs 2019.Tryggingagjaldsprósentan með markaðsgjaldinu og gjaldi í ábyrgðarsjóð launa hefur farið úr 7,59% 2014 í 6,60%  2019 og verður 2020 6,35% sem styður við atvinnusköpun og rekstrargrundvöll fyrirtækja. Hæst var prósentan 8,65% árin 2010 og 2011.

Reiknivél tekjuskatts

Dæmi úr reiknivélinni:

Tekjur 280.000 á mánuði  - tekjuskattur lækkar um 69.792 á ári.

Viðkomandi greiðir eftir breytinguna engan tekjuskatt til ríkisins því persónuafsláttur verður hærri en álagður tekjuskattur. Öll hans staðgreiðsla fer til sveitarfélagsins.

Skattbyrðin fer úr 14,5% í 12,4%.

Tekjur 370.000 á mánuði - tekjuskattur lækkar um 124.620 á ári.

Skattbyrðin lækkar úr 20,5% í 19,5%.

Tekjur 835.000 á mánuði - tekjuskattur lækkar um 72.000 kr.á ári.

Skattbyrðin lækkkar úr 29,4% í 28,7%.