Norðurslóðadagar í sendiráði Íslands í Washington og opnun sýningarinnar Jökull
Sýning á verkum ljósmyndarans Ragnars Axelssonar, Jökull, opnaði þann 22. maí í sýningarrými sendiráðs Íslands í Washington. Í tilefni þess og til að fagna formennsku Íslands í Norðurskautsráðinu var efnt til fjölmenns opnunarhófs og ráðstefnu um viðskipti á norðurslóðum.
Heiðursgestir kvöldsins voru Einar Gunnarsson sendiherra málefna norðurslóða og ljósmyndarinn Ragnar Axelsson. Geir H. Haarde sendiherra flutti opnunarávarp og Einar Gunnarsson hélt ræðu um um áherslumál Íslands á norðurslóðum og um formennskuáætlun Íslands undir heitinu “Saman til sjálfbærni á norðurslóðum”. Þá hélt Ragnar Axelson erindi um verk sýningarinnar, um störf sín á norðurslóðum og sýndi myndir og myndbönd frá norðurslóðum.
Sýningin Jökull er óður til jökla á Íslandi. Ragnar ólst upp í grennd við jökla og hefur flogið vél sinni í ótal skipti yfir hjarnbreiður þeirra. Nær því óhlutdrægar svart-hvítar myndir opna okkur sýn yfir form, áferð og mynstur jökla eins og þau birtast á flugi sem hefst ofar skýjum og lýkur við sjávarmál. Sýning verður opin almenningi um helgar í húsnæði sendirásðins fram til 11. ágúst 2019. Þá verður sýningin sett upp í National Nordic Museum í Seattle í tengslum við norðurslóðadaga í safninu.
Norðurslóðaþemanu í Washington lauk með ráðstefnu um viðskipti á norðurslóðum á fimmtudeginum 23. maí í sendiráðinu.
Formennska Íslands í Norðurskautsráðinu, efnahagshvatar og fjárfestingar á norðurslóðum voru aðalefni ráðstefnunnar, sem bar yfirskrifstina Doing Business in the Arctic. Ráðstefnan, sem er fyrsti viðburðurinn sem tengist formennsku Íslands í Norðurskautsráðinu, var skipulögð af Íslensk-ameríska viðskiptaráðinu í Bandaríkjunum, sendiráði Íslands í Washington, Efnahagsráði norðurslóða og Wilson Center’s Polar Institute í Washington. Þátttakendur voru bæði úr einkageiranum og opinbera geiranum frá Bandaríkjunum, Íslandi, Grænlandi og Finnlandi
Fundarstjóri var Jón Sigurðsson forstjóri Össurar og stjórnarformaður Íslensk-ameríska viðskiptaráðsins. Meðal ræðumanna var utanríkisráðherra Íslands, Guðlaugur Þór Þórðarson, sem hélt ræðu um formennskuáætlun Íslands og tók þátt í pallborðsumræðum um fjárfestingar norðurslóðum.
