Hoppa yfir valmynd

Haus fyrir smærri skjái

Merki Stjórnarráðs Íslands Stjórnarráð Íslands
7. október 2022 Utanríkisráðuneytið

Föstudagspósturinn 7. október 2022

Heil og sæl.

Af utanríkisþjónustunni er þetta helst að frétta úr vikunni.

Íslensk stjórnvöld komu í vikunni hörðum mótmælum formlega á framfæri við rússnesk stjórnvöld við ólöglegri innlimun héraða í Úkraínu og marklausum atkvæðagreiðslum sem þar voru haldnar. Martin Eyjólfsson, ráðuneytisstjóri í utanríkisráðuneytinu boðaði Mikhaíl Noskov, sendiherra Rússlands, á fund þar sem hann áréttaði fordæmingu Íslands á tilraunum Rússlands til að innlima úkraínskt landssvæði. Um ólöglegan gjörning væri að ræða sem Ísland viðurkenndi ekki undir neinum kringumstæðum. Þá brytu atkvæðagreiðslur sem haldnar voru í fjórum héruðum í austurhluta Úkraínu algerlega í bága við alþjóðalög. Þessi framganga, auk óábyrgra hótana um beitingu kjarnavopna, væru alvarlegasta stigmögnun átakanna frá því að Rússar réðust inn í Úkraínu 24. febrúar sl.


Áður hafði ráðherra tjáð sig um málið á Twitter.

Skemmdir á Nord Stream gasleiðslunum voru í brennidepli á fjarfundi varnarmálaráðherra þátttökuríkja í Sameiginlegu viðbragðssveitinni (Joint Expeditionary Force, JEF) sem fram fór á mánudag. Sameiginleg yfirlýsing var gefin út á fundinum þar sem skemmdarverkin eru harðlega fordæmd.

„Samráð á vettvangi JEF er mikilvægur liður í að efla stöðuvitund og stilla saman strengi við Norðurlöndin, Eystrasaltsríkin, Bretland og Holland. Það er ríkur vilji í þessum hópi til að styðja Dani, Svía og Þjóðverja við rannsókn málsins, efla samstarf um að verja lykilinnviði og auka stöðugleika á þessu svæði,“ sagði Þórdís Kolbrún Reykfjörð Gylfadóttir utanríkisráðherra sem tók þátt í fundinum.

Þá birtum við einnig stutta færslu um tvo nýja sendiherra sem nýlega bættust í diplómatahópinn með aðsetur hér í Reykjavík. 


Sendiráð okkar í París og Washington buðu þá einnig velkomna.

En þá að sendiskrifstofum okkar.

Norrænu sendiráðin gagnvart Hollandi stóðu í lok september fyrir málstofu í Amsterdam um sjálfbærni í matvælaframleiðslu og hvernig mætti tryggja framtíð hennar á sem hagkvæmastan hátt. Málstofan var hluti af umræðuröðinni Nordic Talks, sem Norðurlandaráð og Norræna ráðherranefndin standa fyrir.

Á vettvangi sendiráðs Íslands í Kaupmannahöfn fór fram árlegur fundur sendiráðsins með kjörræðismönnum Danmerkur ásamt kjörræðismönnum Tyrklands, Rúmeníu og Búlgaríu, en sendiráðið fer með fyrirsvar gagnvart þeim löndum. Í allt eru 15 kjörræðismenn starfandi í þessum fjórum löndum.

Í Osló fékk sendiráðið heimsókn frá fyrirtækinu Gen2 Energy sem stefnir að stórtækri framleiðslu á grænu vetni og er þessa dagana að koma upp framleiðslu- og flutningsstöðvum á fjórum stöðum í Noregi sem mun framleiða grænt vetni á stórum skala fyrir innlendan og erlendan markað.

Í Helsinki tók Reynir Þór Eggertsson, lektor í íslensku við háskólann í Helsinki, á móti Harald Aspelund, sendiherra Íslands í Finnlandi.

Þá var Sturla Sigurjónsson sendiherra Íslands í London, viðstaddur viðburð þar sem frumkvöðlar úr íslenska tölvuleikjageiranum komu saman og hittu fyrir fjárfesta í Bretlandi.

Í París bauð Unnur Orradóttir Ramette sendiherra til móttöku í embættisbústað sínum þar sem leikskáldinu Tyrfingi Tyrfingssyni var boðið, en verk hans hafa verið sett upp víða erlendis, þar á meðal í París.

Á vettvangi Sameinuðu þjóðanna, bæði í New York, og svo í mannréttindaráðinu í Genf, er svo nóg að gera að vanda.

Í Bandaríkjunum kíkti Bergdís Ellertsdóttir sendiherra í Washington, á viðburð Taste of Iceland.

Þá var Davíð Logi Sigurðsson, sendifulltrúi, fulltrúi sendiráðs Íslands í Washington þegar ný bók White House History var gefin út, Official Residences, þar sem Bessastöðum bregður fyrir.

Í Kanada var vikan viðburðarík hjá Hlyni Guðjónssyni, sendiherra Íslands þar í landi.

Í Kína veitti Þórir Ibsen, Chamnarn Viravan, fyrrverandi ræðismanni Íslands í Bangkok, fálkaorðuna.

Þar í landi hefur Þórir haft í nógu að snúast.

Fyrstu nemendur í sérstakri starfsþjálfun ungmenna í Mangochi útskrifuðust í vikunni en verkefnið er hluti af byggðaþróunarverkefni íslenskra stjórnvalda með héraðsyfirvöldum. Ungmennin komu víða að úr héraðinu og þau fá þjálfun í ýmiss konar handverki og gerð viðskiptaáætlana í þeim tilgangi að fjölga atvinnutækifærum þeirra.

Þá kvaddi sendiráðið tvo starfsmenn sína, þær Chiliritso Bertha Mzoma Gwaza og Ragnheiði Matthíasdóttur.

Í Kampala sagði okkar fólk frá afhendingu á  almenningssalernum í Mutumba í Namayingo héraði. Nú hefur samfélagið aðgengi að ókeypis almenningssalernum, þar á meðal fyrir fatlað fólk.

Þá sögðum við einnig frá framlengdum fresti fyrir umsóknir í Heimsmarkmiðasjóð atvinnulífs um þróunarsamvinnu í vikunni.

Við minnum að endingu á fréttaveitu okkar, Heimsljós.

Framundan í næstu viku er svo Hringborð norðurslóða - Arctic Circle, þar sem utanríkisþjónustan tekur að vanda virkan þátt.

Fleira var það ekki að sinni.

Bestu kveðjur frá upplýsingadeild.

Efnisorð

Föstudagspóstur

Hafa samband

Ábending / fyrirspurn
Ruslvörn
Vinsamlegast svaraðu í tölustöfum

Ef um er að ræða áríðandi erindi til borgaraþjónustu utanríkisráðuneytisins þá skal senda póst á [email protected]

Upplýsingar um netföng, símanúmer og staðsetningu ráðuneyta