Samið um bætta sjúkraflutninga
Tveir samningar um sjúkraflutninga voru undirritaðir í dag, annar var gerður við Slökkvilið Akureyrar og hinn við Brunavarnir Suðurnesja. Guðlaugur Þór Þórðarson, heilbrigðisráðherra, og forsvarsmenn Slökkviliðsins og Brunvarnanna undirrituðu samningana, en ráðuneytið greiðir um 70 milljónir króna á ári fyrir hvorn samning.
Á svæði Brunavarna Suðurnesja eru nú farnir um 1.760 sjúkraflutningar á ári, þar af eru flutningar út fyrir heilsugæslusvæðið um 850. Gert er ráð fyrir sambærilegum fjölda sjúkraflutninga á gildistíma samnings, þó með tilteknum frávikum. Á Akureyri eru um 1.230 sjúkraflutningar árlega og þar af eru flutningar út fyrir heilsugæslusvæðið um 125. Auk þess eru umtalsverðir flutningar vegna sjúkraflugs.
Þjónustusvæðið á Suðurnesjum nær til sjúkraflutninga í umdæmi Heilbrigðisstofnunar Suðurnesja að undanskildu svæði Heilsugæslustöðvarinnar í Grindavík. Svæði sjúkraflutninga sem Brunavarnir Suðurnesja annast eru öll Suðurnes þ.e.a.s. frá Hvassahrauni, nánar tiltekið sunnan Virkishóla við Ísal, álver Alcan í Straumsvík, um öll Suðurnes að Reykjanestá utan Grindavíkur, um Seltjörn. Einnig flutningar út fyrir svæðið þegar um er að ræða flutninga milli stofnana og/eða aðstoð við aðra sjúkraflutningaaðila. Þjónustusvæðið nyrðra nær til sjúkraflutninga í umdæmi heilsugæslustöðvarinnar á Akureyri. Svæði heilsugæslustöðvar Akureyrarbæjar er auk Akureyrar; Arnarneshreppur, Hörgárbyggð, Eyjarfjarðarsveit, Svalbarðsstrandahreppur, Grýtubakkahreppur og hluti Þingeyjarsveitar, sem áður hét Hálshreppur. Innifaldir í sjúkraflutningum eru sjúkraflutningar til og frá flugvöllum. Þá teljast flutningar út fyrir heilsugæslusvæðið með sama hætti til þjónustusvæðisins.
Samningarnir eru gerðir á grundvelli
- Laga um heilbrigðisþjónustu nr. 40/2007
- reglugerð um sjúkraflutninga, nr. 503/1986
- reglugerð um menntun, réttindi og skyldur sjúkraflutningamanna, nr. 504/1986
- laga um samræmda neyðarsímsvörun, nr. 25/1995.
Sjúkraflutningum er samkvæmt samningum skipt í fjóra flokka skilgreinda flokka:
- F1 sjúkraflutningur sem þýðir flutningur vegna alvarlegs slyss eða sjúkdóma. Í þeim tilvikum er nauðsynlegt að senda strax neyðarbifreið.
- F2 sjúkraflutningur þýðir að um er að ræða alvarlegt slys eða sjúkdóma, en ekki er talin þörf á læknisaðstoð. Í þessum tilvikum er nauðsynlegt að senda strax sjúkrabifreið í forgangsakstri.
- F3 sjúkraflutningur er þegar um er að ræða vægari sjúkdómstilfelli og minni háttar slys.
- F4 er almennur flutningur þegar ekki er um að ræða bráð veikindi eða slys
Heilbrigðisráðherra undirritar samning við
bæjarstjórann á Akureyri og forsvarsmenn
Brunavarna Suðurnesja
