Sendinefnd nýsköpunar, háskóla og rannsókna til Singapúr í nóvember

Háskóla-, iðnaðar- og nýsköpunarráðherra, Áslaug Arna Sigurbjörnsdóttir, skipuleggur ferð sendinefndar til Singapúr í nóvember. Áhersla er lögð á sköpun starfa í þekkingarsamfélagi og verður ferðin farin dagana 7.-11. nóvember í samstarfi við Íslandsstofu.

Megináherslur heimsóknarinnar eru nýsköpun, háskólar og rannsóknir, hvernig leiða megi saman þekkingu og atvinnulíf og hvernig læra megi af stefnu stjórnvalda í Singapúr á því sviði. Einnig munu tækifæri gefast til fyrirtækjaheimsókna og -kynninga. 

Undanfarin ár hefur Singapúr staðið fremst þjóða á sviði háskóla-, nýsköpunar- og tækniumhverfis. Stjórnvöld þar í landi hafa, í samvinnu við atvinnulífið, byggt upp veigamikið þekkingarsamfélag þar sem alþjóðasamstarf er haft að leiðarljósi. Stuðningur stjórnvalda, skýr markmið og aðgerðir hafa ár eftir ár leitt til þess að landið sitji í efstu sætum á sviði samkeppnishæfni og á lista yfir hinar svokölluðu snjallborgir heimsins. 

Undirbúningur er þegar hafinn að dagskrá, viðburðum og kynningu á vettvangi háskóla, hugvits og nýsköpunar. 

Aðilar sem hafa áhuga á að taka þátt og nýta þetta tækifæri til þess að efla tengsl við landið eru beðin um að fylla út skráningarform Íslandsstofu.